ფიფას მაღალჩინოსნებმა ინფანტინოს მშვიდობის პრიზის შეცვლა მოსთხოვეს

გარდიანის (The Guardian) ინფორმაციით, საბჭოს რამდენიმე წევრმა ჯილდოს გაუქმება მოითხოვა. სხვებმა კი პრიზის დეპოლიტიზაციას დაუჭირეს მხარი. ფიფას საფეხბურთო სოციალური პასუხისმგებლობის კომიტეტმა რეკომენდაცია საბჭოს მომდევნო სხდომამდე უნდა მოამზადოს, რომელიც 16 დეკემბერს დოჰაში გაიმართება.

ინფანტინომ ხუთშაბათის სხდომის დასაწყისში განაცხადა, რომ მშვიდობის პრიზის საკითხი სოციალური პასუხისმგებლობის კომიტეტს გადაეცა. მოგვიანებით საბჭოს წევრები ამ თემას დაუბრუნდნენ, როცა ფიფაში ინტერესთა შესაძლო კონფლიქტის შესახებ კითხვები დასვეს.

საბჭოს ბევრ წევრს მიაჩნია, რომ მშვიდობის პრიზის ამჟამინდელი ფორმა ტრამპთან კავშირმა შელახა. ზოგიერთმა მათგანმა გამოთქვა შეშფოთება, რომ აშშ-ის პრეზიდენტმა შესაძლოა მომდევნო ლაურეატი არ მოიწონოს და დიპლომატიური სკანდალი გამოიწვიოს.

ფიფას სოციალური პასუხისმგებლობის კომიტეტი 22 წევრისგან შედგება. მასში ინფანტინოსადმი ლოიალური ქვეყნების წარმომადგენლები ჭარბობენ. ამიტომ ჯილდო შესაძლოა არ გაუქმდეს, რადგან ეს ფიფას პრეზიდენტისთვის დამამცირებელი იქნებოდა. თუმცა ცვლილების აუცილებლობას ფართოდ აღიარებენ.

საბჭოს ერთ-ერთმა წევრმა გარდიანს განუცხადა, რომ განხილული ვარიანტებიდან ყველაზე სავარაუდო პრიზის გარდაქმნაა. ამ შემთხვევაში ჯილდო საფეხბურთო სფეროში მოღვაწე ადამიანს გადაეცემა, რომელმაც სოციალური ჰარმონიისა და პასუხისმგებლობის ხელშეწყობისთვის განსაკუთრებული სამუშაო შეასრულა. წესებში ასევე ჩაიწერება, რომ ჯილდო პოლიტიკოსს ვერ გადაეცემა.

ფიფას წესდების მეორე მუხლი ფეხბურთში ნებისმიერ პოლიტიკურ ან სამთავრობო ჩარევას კრძალავს. ეს ერთ-ერთი მიზეზია, რის გამოც გასულ წელს ტრამპის დაჯილდოებას ფიფას ბევრი წევრის მწვავე რეაქცია მოჰყვა.

ფიფამ მშვიდობის პრიზის შექმნა გასული წლის ნოემბერში გამოაცხადა. ორგანიზაციის განმარტებით, ის „დააჯილდოებს ადამიანებს, რომლებმაც მშვიდობისთვის განსაკუთრებული და გამორჩეული ნაბიჯები გადადგეს და ამით მთელ მსოფლიოში ადამიანები გააერთიანეს“.

ტრამპს ჯილდო გასული წლის დეკემბერში, ვაშინგტონში, კაცთა მსოფლიო ჩემპიონატის წილისყრისას გადასცეს. ინფანტინომ აშშ-ის პრეზიდენტს ოქროს თასი, მედალი და სერტიფიკატი გადასცა. თუმცა მისი შერჩევის პროცესი არასდროს გასაჯაროებულა.

მოსალოდნელია, რომ სოციალური პასუხისმგებლობის კომიტეტი განხილვის ფარგლებში ჯილდოს შენარჩუნების შემთხვევაში მკაცრ კრიტერიუმებს დაადგენს. კომიტეტმა ასევე წარდგენისა და შერჩევის პროცედურის დეტალები უნდა წარმოადგინოს.