რუსეთის „მეტრომ“ უკრაინის წინააღმდეგ ომისთვის მილიარდი რუბლი გაიღო

გერმანული სავაჭრო ჯგუფის, „მეტროს“, რუსულმა შვილობილმა კომპანიამ რუსეთის საომარ ძალისხმევას მილიარდი რუბლი, დაახლოებით 10,9 მილიონი ევრო, გამოუყო. ეს მოხდა ერთი თვის შემდეგ, რაც რუსეთის პრეზიდენტმა ვლადიმერ პუტინმა რუსული „მეტრო“ დროებით სახელმწიფო მართვაში გადაიყვანა.

პარასკევს გამოქვეყნებული განცხადების თანახმად, თანხა აღჭურვილობის, მათ შორის საკომუნიკაციო მოწყობილობებისა და დრონების საწინააღმდეგო ტექნიკის შესაძენად უნდა გამოიყენონ. კომპანიის ვებსაიტზე გენერალურმა დირექტორმა იოჰანეს მარია ტოლაიმ განაცხადა: „როგორც რუსეთის ეკონომიკური სისტემის ნაწილი, მიგვაჩნია, რომ მნიშვნელოვანია, სახელმწიფოს სტრატეგიულ ინიციატივებში მივიღოთ მონაწილეობა“.

განცხადების თანახმად, „მეტრო რუსეთმა“ შემოწირულობა ფონდს „სახალხო ფრონტი. ყველაფერი გამარჯვებისთვის!“ გადაურიცხა. ფონდს მართავს ორგანიზაცია „სრულიადრუსეთის სახალხო ფრონტი“, პოლიტიკური მოძრაობა, რომელიც პუტინის ინიციატივით დაარსდა.

დიუსელდორფში დაფუძნებულმა გერმანულმა „მეტრო აგიმ“ განცხადებაში მილიონიანი შემოწირულობისგან გამიჯნა თავი. კომპანიამ აღნიშნა, რომ ეს ეხება „უკრაინის წინააღმდეგ რუსეთის ომის ნებისმიერ მხარდაჭერას. საომარი მოქმედებების დაფინანსება ან მხარდაჭერა არც ჩვენს პოზიციას შეესაბამება და არც ჩვენი ბიზნესის წარმოების წესს“.