რუსეთმა და უკრაინამ ოლეშკიში ცეცხლის შეწყვეტაზე შეთანხმდნენ

აშშ-ის პირველი ლედი მელანია ტრამპის შუამავლობით რუსეთი და უკრაინა რუსეთის მიერ კონტროლირებად ქალაქ ოლეშკიში ცეცხლის შეწყვეტაზე შეთანხმდნენ. თეთრი სახლის ცნობით, შეთანხმება 29 ოქტომბერს ამოქმედდება.

რუსეთის ძალების მიერ 2022 წლის თებერვლიდან ოკუპირებული სამხრეთ უკრაინის ქალაქის მცხოვრებლები აცხადებენ, რომ საკვების დეფიციტი სულ უფრო მწვავდება.

თეთრი სახლის განცხადებაში ნათქვამია: „ორივე ქვეყანა შეთანხმდა, რომ ოლეშკიში ყველა სამხედრო მოქმედებას დროებით შეაჩერებს, რათა ჰუმანიტარული დახმარების შეტანა და განსაზღვრული უსაფრთხო დერეფნით მშვიდობიანი მოსახლეობის ევაკუაციის მომზადება შესაძლებელი გახდეს“.

ეს შეთანხმება იმ ფონზე შედგა, როცა მელანია ტრამპის მეუღლე, პრეზიდენტი დონალდ ტრამპი, უკრაინის პრეზიდენტ ვოლოდიმირ ზელენსკის ზეწოლას ახდენს, რათა მან რუსეთის პრეზიდენტ ვლადიმერ პუტინთან ომის დასრულების შესახებ შეთანხმებას მიაღწიოს. ომი 2022 წლის თებერვალში, რუსეთის უკრაინაში შეჭრით დაიწყო.

მელანია ტრამპი აქტიურად ცდილობს, ომის დროს რუსეთის მიერ წაყვანილი უკრაინელი ბავშვები ოჯახებს დაუბრუნდნენ.

მელანია ტრამპმა განცხადებაში აღნიშნა: „ოლეშკიში ვითარება მძიმეა. ოლეშკი ფრონტისპირა ქალაქია, რომელიც კატასტროფის ზღვარზეა. ქალაქში დარჩენილი მოსახლეობა ძირითადად ხანდაზმული ადამიანებისგან შედგება. მათ სასწრაფოდ სჭირდებათ სამედიცინო დახმარება, წამლები, საკვები და სუფთა წყალი“.

პირველი ლედის თქმით, ცეცხლის შეწყვეტა ორივე ქვეყნის არასამხედრო ჯგუფებს საშუალებას მისცემს, მცხოვრებლებს სახლებში ეწვიონ და მათ ტრანსპორტირება შეუთანხმონ. ევაკუაციის მსურველები რუსეთში ან უკრაინაში წასვლას შეძლებენ. პროცესის დოკუმენტირებისთვის ჯგუფებს თან გაჰყვება დაუსახელებელი მედიაორგანიზაცია.

მემარჯვენე შეხედულებების საინფორმაციო გამოცემა ნიუსმაქსმა (Newsmax) გაავრცელა ინფორმაცია, რომ მის კამერებს „ამ ძალისხმევის ექსკლუზიურად გადაღების შესაძლებლობა“ მიეცემოდა.

ოლეშკი დნიპროს მდინარის გაღმა, ხერსონის მოპირდაპირე მხარეს მდებარეობს. თეთრი სახლის ცნობით, ქალაქში 1 700-დან 2 000-მდე ადამიანი დარჩა, უმეტესად ხანდაზმულები, ასევე დაახლოებით 50 ბავშვი. ომამდე ქალაქის მოსახლეობა დაახლოებით 24 000-ს შეადგენდა. თეთრი სახლის მონაცემებით, კახოვკის კაშხლის ნგრევის შემდეგ ქალაქის დაახლოებით 90% დაიტბორა.

განცხადების თანახმად, მელანია ტრამპი და მისი წარმომადგენელი ლოკალური ცეცხლის შეწყვეტის პირობების განსაზღვრაზე უშუალოდ რუსეთისა და უკრაინის ხელმძღვანელობასთან მუშაობდნენ.

მელანია ტრამპმა განაცხადა: „ევაკუაციის მსურველები კოორდინირებულ დახმარებასა და მათთვის სასურველ დანიშნულების ადგილამდე ტრანსპორტირებას მიიღებენ. ვფიქრობ, ზოგი რუსეთში წასვლას ისურვებს, ზოგი კი უკრაინაში“.