რვა შტატი OpenAI-ს ChatGPT-ის უსაფრთხოების გამო უჩივის

როიტერსის ცნობით, აშშ-ის რვა შტატმა OpenAI-ის წინააღმდეგ ცალ-ცალკე ახალი სარჩელები შეიტანა. აიოვა, კანზასი, ნებრასკა, დასავლეთი ვირჯინია, არკანზასი, არიზონა, აიდაჰო და მონტანა კომპანიას ბავშვების დაზიანებასა და ChatGPT-ის უსაფრთხოების შესახებ მომხმარებლების შეცდომაში შეყვანაში ადანაშაულებენ. სარჩელების თანახმად, OpenAI-მ ChatGPT-ის შექმნისას უკანონოდ მოგება უსაფრთხოებაზე წინ დააყენა.

საჩივრების თანახმად, OpenAI-მ ადგილობრივი კანონები დაარღვია, რომლებიც მომხმარებლებს იცავს, რადგან კომპანია მათ ChatGPT-ის საფრთხეებზე არ აფრთხილებდა. მოსარჩელეები მოზარდებისა და ზრდასრულების ოჯახების მიერ შეტანილ რამდენიმე სარჩელს იმოწმებენ. ამ ოჯახების მტკიცებით, ხელოვნური ინტელექტის ჩატბოტმა მათი ახლობლების სიკვდილში გარკვეული როლი ითამაშა.

შტატების მტკიცებით, OpenAI მომხმარებლებს ChatGPT-ს შეცდომაში შემყვანად წარუდგენდა, როგორც „უსაფრთხო, ახალგაზრდებისთვის შესაფერის საშუალებას, რომლისთვისაც უსაფრთხოება უმთავრესია“. სინამდვილეში კი ის „მოწყვლადი მომხმარებლებისთვის სახიფათო“ იყო. მათი თქმით, ჩატბოტი „ასუსტებდა კრიტიკული აზროვნების უნარებს, ხელს უწყობდა პარანოიასა და ბოდვებს, სახიფათო სამედიცინო რჩევებს იძლეოდა და არაჯანსაღ ქცევებსა და ურთიერთობებს ახალისებდა“.

გარდა ამისა, შტატები OpenAI-ს არასრულწლოვანთა მონაცემების შეგროვებაში ადანაშაულებენ. მათი მტკიცებით, კომპანია არასაკმარის ზომებს იღებდა, რათა არასრულწლოვან მომხმარებლებს ჩატბოტი არ გამოეყენებინათ. სარჩელებში OpenAI-ის სავარაუდო „დაუდევრობის“ მტკიცებულებად ასევე მოყვანილია ხელოვნური ინტელექტის გამოყენებით ჰაკერული თავდასხმების ბოლოდროინდელი შემთხვევები, როცა სისტემა კონტროლს გასცდა.

არიზონის სარჩელში ნათქვამია: „OpenAI-მ თავდაპირველი მიზანი დაკარგა. ის საზოგადოებრივ ინტერესებსა და უსაფრთხოებაზე ორიენტირებული არაკომერციული ორგანიზაციიდან საყურადღებო მაგალითად იქცა. ეს მაგალითი აჩვენებს, რა შეიძლება მოხდეს, როდესაც ხელოვნური ინტელექტივით მძლავრი საშუალების შექმნას უსაფრთხოება კი არა, ნებისმიერ ფასად მოგების მიღების მიდგომა განსაზღვრავს და აუცილებელ დამცავ ზომებს გვერდზე სწევს“.

OpenAI-ის წარმომადგენელმა დრიუ პუსატერიმ (Drew Pusateri) ვერჯისთვის (The Verge) გაგზავნილ წერილში განაცხადა, რომ კომპანიამ ChatGPT-ში „დარგში მოწინავე, ასაკობრივ ჯგუფებზე მორგებული დაცვის ზომები“ დანერგა.

პუსატერიმ თქვა: „ვერცერთი სისტემა სრულყოფილი ვერ იქნება, თუმცა ექსპერტებთან მუშაობას გავაგრძელებთ, რათა მათი ცოდნა საქმიანობაში გამოვიყენოთ და დამატებითი დამცავი ზომები შევქმნათ. მათ შორისაა მშობლის კონტროლი, შესვენების შეხსენებები და ასაკისთვის შესაფერისი მოდელის დაცვის ზომები, რომლებიც დღეს უკვე მოქმედებს. მზად ვართ, შტატებთან ვითანამშრომლოთ პრაგმატული პოლიტიკის გასავითარებლად, რომელიც ხელოვნური ინტელექტის მთელ ინდუსტრიაზე გავრცელდება და არა მხოლოდ ერთ კომპანიაზე“.