სამხრეთ კორეა ჩიპების ბაზრის ზრდას 2027 წლის ბოლომდე ელოდება

ლიმ ბანგკოკში, საერთაშორისო სავალუტო ფონდისა და მსოფლიო ბანკის ყოველწლიური შეხვედრების ფარგლებში, სი-ენ-ბი-სის (CNBC) განუცხადა: „ამჟამად მიგვაჩნია, რომ ამ ზრდის შენარჩუნებას სულ მცირე მომავალ წლამდე შევძლებთ. ამის მიზეზი ისაა, რომ ჩიპებზე მოთხოვნასა და მიწოდებას შორის სხვაობა კვლავ ძალიან დიდია, მიწოდება კი ჯერ კიდევ იზრდება“.

ლიმ ეს კომენტარი მას შემდეგ გააკეთა, რაც ამ კვირაში ჩიპების მწარმოებლების აქციების ფასები მკვეთრად დაეცა. მათზე უარყოფითად იმოქმედა ინვესტორების შეშფოთებამ საპროცენტო განაკვეთების ზრდისა და ჩინური კომპანიების მხრიდან გაძლიერებული კონკურენციის გამო. გაყიდვების ტალღა შეეხო სამხრეთკორეულ კომპანიებს, მათ შორის SK Hynix-სა და Seoul Semiconductor-ს, ასევე ამერიკულ გიგანტებს, როგორიც Nvidia-ა.

ლის თქმით, წელს სამხრეთ კორეის საფონდო ბირჟაზე მერყეობა ჩიპების მწარმოებლების აქციებმა გააძლიერა. მინისტრმა მკვეთრი რყევები იმით ახსნა, რომ ჩიპების ინდუსტრიას ქვეყნის ეკონომიკაში სხვა სახელმწიფოებთან შედარებით უფრო დიდი წილი უკავია. ლიმ აღნიშნა, რომ საბაზრო რყევების მიუხედავად, სამხრეთ კორეის ეკონომიკა „მყარია“.

ხუთშაბათს გავლენიან სამხრეთკორეულ გამოცემა Maeil Business Newspaper-ში გამოქვეყნებული მოსაზრების სვეტის ავტორმა მთავრობას ხელოვნური ინტელექტის აღმავლობის მოსალოდნელი შენელებისთვის მომზადებისკენ მოუწოდა. სი-ენ-ბი-სის თარგმანის თანახმად, ავტორმა განაცხადა, რომ ორი ექსპერტი ჩიპების „ახალი მიწოდების მოზღვავებას“ ელოდება. მათი ვარაუდით, ეს მეხსიერების ბაზარს 2029 წლისთვის „წითელ ოკეანედ“ აქცევს.

სამხრეთ კორეის ჩიპების ინდუსტრია საფონდო ბირჟაზე მერყეობას აძლიერებს, თუმცა მან საგადასახადო შემოსავლების ზრდასაც შეუწყო ხელი. ლის თქმით, ქვეყანა წელს თავდაპირველ პროგნოზზე მეტი გადასახადის აკრეფას ელოდება.

ლიმ დასძინა, რომ ჩიპების ბაზრის აღმავლობა საბოლოოდ სამხრეთ კორეის ფისკალურ მდგომარეობას გააუმჯობესებს.