საუდის არაბეთში ჰუსიების ჭურვმა ორი ადამიანი დაჭრა

საუდის არაბეთის სამოქალაქო თავდაცვამ განაცხადა, რომ იემენელი ჰუსიების მიერ ნასროლი ჭურვი ქვეყნის სამხრეთ ჯაზანის რეგიონს მოხვდა. შედეგად, ორი ადამიანი დაიჭრა, მეჩეთი და რამდენიმე შენობა კი დაზიანდა.

სამსახურმა დასძინა, რომ ჭურვი შაბათს ჯაზანის ალ-ტუვალის რაიონში ჩამოვარდა და რამდენიმე ავტომობილიც დააზიანა.

სამოქალაქო თავდაცვის წარმომადგენელმა სამოქალაქო ობიექტებზე იერიშს „საერთაშორისო ჰუმანიტარული სამართლის უხეში დარღვევა“ უწოდა. მისი თქმით, შესაბამისმა სამსახურებმა საგანგებო სიტუაციებისთვის დადგენილი პროცედურები აამოქმედეს.

ირანთან დაკავშირებული ჰუსიები იემენის საერთაშორისოდ აღიარებულ და საუდის არაბეთის მიერ მხარდაჭერილ მთავრობას ებრძვიან. მათ განაცხადეს, რომ სამხრეთ ნაჯრანის პროვინციის ქალაქ შარურაში მდებარე საუდის სამხედრო ბაზას ბალისტიკური რაკეტებითა და დრონებით შეუტიეს. ჰუსიების სამხედრო წარმომადგენელმა იაჰია სარიმ X-ზე დაწერა, რომ იერიში „იარაღის საწყობებსა და სამეთაურო და მართვის ცენტრებს“ მოხვდა. მისი თქმით, სამიზნე ობიექტები „ჩვენი ერისა და ხალხის წინააღმდეგ აგრესიას მართავდნენ“.

სარის არ უთქვამს, როდის განხორციელდა იერიში. მან საუდის არაბეთი გააფრთხილა, რომ შემდგომ სამხედრო მოქმედებებს ქვეყნის ტერიტორიაზე უფრო ღრმა, მასშტაბური და ინტენსიური დარტყმები მოჰყვებოდა.

მოგვიანებით საუდის არაბეთის სამოქალაქო თავდაცვამ განაცხადა, რომ ხამის-მუშაიტის რაიონში საფრთხემ ჩაიარა. მანამდე იქ მცხოვრები მოსახლეობა გააფრთხილეს.

ბოლო დღეებში ჰუსიებმა საუდის არაბეთის სამხრეთზე სარაკეტო და დრონებით იერიშები განახორციელეს.

სამშაბათს დაჯგუფება საუდის ქალაქებში, აბჰაში, ხამის-მუშაიტში, ჯაზანსა და ნაჯრანში, სამოქალაქო და ეკონომიკურ ობიექტებს დაესხა თავს. დაიჭრა 73 ადამიანი, მათ შორის ქალები და ბავშვები.

სამეფოზე იერიშები იემენში ხანგრძლივი კონფლიქტის სწრაფი გამწვავების ნაწილია. გაეროს შუამავლობით მიღწეული ზავის პირობებში დაახლოებით ოთხწლიანი შედარებითი სიმშვიდის შემდეგ, კონფლიქტი ივლისში კვლავ გაჩაღდა.

ჰუსიებმა იემენის წითელი ზღვის მთელი სანაპირო დაიკავეს და სტრატეგიული საპორტო ქალაქი მოხა ხელში ჩაიგდეს. იემენის სამთავრობო ძალებმა კი ალ-ჯაუფში, მარიბსა და ალ-ბაიდაში ახალი ფრონტები გახსნეს.

მიგრაციის საერთაშორისო ორგანიზაციისა და ადგილობრივი ოფიციალური პირების ცნობით, ბრძოლებში 500-ზე მეტი ადამიანი დაიღუპა, ათიათასობით ადამიანი კი იძულებით გადაადგილდა.

გაეროს უშიშროების საბჭომ კრიზისთან დაკავშირებით ამ თვეში საგანგებო სხდომა გამართა. სპეციალურმა წარმომადგენელმა ჰანს გრუნდბერგმა გააფრთხილა, რომ იემენის წინაშე „ომის ახალი და უფრო სახიფათო ეტაპი“ დგას.