სერბ ჩოგბურთელს მატჩების გარიგებისთვის 2050 წლამდე დისკვალიფიკაცია მისცეს

სტეფან მილიჩევიჩს ექვსი მატჩის გარიგებაში დასდეს ბრალი. მათგან ხუთში თავად მონაწილეობდა. 2014 წელს მან მსოფლიო რეიტინგში კარიერის საუკეთესო, 1 338-ე ადგილი დაიკავა.

პროფესიული ჩოგბურთის დაბალ საფეხურებზე მოთამაშე 29 წლის მილიჩევიჩს კიდევ ექვსი მატჩის გარიგების მცდელობაშიც დასდეს ბრალი. ეს შემთხვევები 2022-დან 2024 წლამდე პერიოდს მოიცავდა.

ჩოგბურთის კეთილსინდისიერების საერთაშორისო სააგენტომ (International Tennis Integrity Authority, ITIA) განაცხადა, რომ მატჩების გარიგების გარდა, მილიჩევიჩს რამდენიმე პროფესიონალი მოთამაშის გადაბირებასა ან გადაბირების მცდელობაშიც დასდეს ბრალი. სააგენტოს ცნობით, ეს „კორუფციული ქსელის ფარგლებში“ ხდებოდა.

ITIA-მ მილიჩევიჩის მიერ გადაბირებულ მოთამაშეებსაც მატჩების გარიგებაში დასდო ბრალი.

მილიჩევიჩის სასჯელის სიმკაცრე ნაწილობრივ გამოძიებასთან თანამშრომლობაზე უარის თქმამ განაპირობა.

ITIA-მ აღნიშნა, რომ დამოუკიდებელი ორგანიზაცია მასთან დაკავშირებას შვიდჯერ ცალკე შეეცადა, თუმცა მილიჩევიჩი პროცესში „არ ჩაერთო“.

მილიჩევიჩს 53 000 ფუნტის ჯარიმაც დაეკისრა. მას სპორტში მონაწილეობა 2050 წლის ოქტომბრამდე ეკრძალება, როცა 53 წლის გახდება.

დისკვალიფიკაციის პერიოდში მას ეკრძალება თამაში, მწვრთნელობა ან დასწრება იმ ღონისძიებებზე, რომლებსაც მსოფლიო ჩოგბურთი (World Tennis), ქალთა ჩოგბურთის ასოციაცია (WTA), პროფესიონალ ჩოგბურთელთა ასოციაცია (ATP), დიდი სლემის ტურნირები ან რომელიმე ეროვნული ასოციაცია ატარებს ან ამტკიცებს.

დეკემბერში ფრანგ ჩოგბურთელ კვენტინ ფოლიოს 20-წლიანი დისკვალიფიკაცია მისცეს. ITIA-მ დაადგინა, რომ ის მატჩების გარიგების სინდიკატის სასარგებლოდ მოქმედ მოთამაშეთა ქსელში ცენტრალური ფიგურა იყო.

ფოლიომ ბრალდებები უარყო. ისინი 2022-დან 2024 წლამდე გამართულ 11 მატჩს ეხებოდა, რომელთაგან რვაში თავად მონაწილეობდა. 2022 წელს ფოლიომ რეიტინგში კარიერის საუკეთესო, 488-ე ადგილი დაიკავა.

თუმცა მოსმენაზე 30 ბრალდებიდან 27 დადასტურდა. ისინი 11 მატჩიდან 10-ს ეხებოდა.