Spotify Family-ის გეგმებზე მისამართის გაზიარებას ამოწმებს

Spotify-ის თანააღმასრულებელმა დირექტორმა განაცხადა, რომ კომპანია ვერიფიკაციის მეთოდებს კვლავ დახვეწს, რადგან დროთა განმავლობაში მომხმარებლები QR-კოდების მსგავსი მეთოდების გვერდის ავლის გზებს პოულობენ.

Spotify-ის თანააღმასრულებელმა დირექტორმა ალექს ნორსტრომმა ამ კვირის შემოსავლების შესახებ საუბრისას დაადასტურა, რომ კომპანია ახალი QR-კოდით ამოწმებს Family Plan-ის მომხმარებლებს, რომლებიც სინამდვილეში ერთად არ ცხოვრობენ. დასკანერებისთვის საჭიროა გეგმის მმართველის ტელეფონი. TechCrunch-ის ცნობით, „შეზღუდვებთან“ დაკავშირებული კითხვის პასუხად ნორსტრომმა ამას „ჩვეულებრივი გაუმჯობესება“ უწოდა:

„ეს იმდენად შეზღუდვა კი არ არის, რამდენადაც Family Plan-ის ვერიფიკაციის მეთოდების ჩვეულებრივი გაუმჯობესება. Family Plan დიდი ხანია არსებობს. Spotify-ის ისტორიაში ის, ვფიქრობ, უკვე დაახლოებით 12, 13 წელია მოქმედებს და ჩვენი გამომწერების საკმაოდ მნიშვნელოვან ნაწილს შეადგენს.

ამიტომ მნიშვნელოვანია, დროთა განმავლობაში ჩვენი ვერიფიკაციის მეთოდები გავაუმჯობესოთ. დროთა განმავლობაში, რა თქმა უნდა, ამ მეთოდების გვერდის ავლის გზებს პოულობენ. როცა ეს ხდება, ჩვენ ვადგენთ, როგორ გავაუმჯობესოთ ისინი. ამას დასრულების თარიღი არ აქვს. ეს ისეთი დანერგვა არ არის, რომელიც ოდესმე დასრულდება. ეს უბრალოდ მუდმივი, ჩვეულებრივი პროცესია“.

Spotify პირველად არ ცდილობს Family Plan-ების გაზიარების შეზღუდვას. კომპანიის თქმით, ამ გეგმებით სარგებლობა მხოლოდ ერთი ოჯახის წევრებს შეუძლიათ. ახალი QR-კოდით ვერიფიკაციის მეთოდის გამო ზოგიერთ მომხმარებელს საერთო Premium-გამოწერის შესანარჩუნებლად გამოსავლის მოძებნა მოუწია. კოდი რამდენიმე წამში ერთხელ ახლდება. ვინც მის დასასკანერებლად შვიდდღიან ვადას გაუშვებს, 12 თვის განმავლობაში სხვა Family ან Duo გეგმას ვეღარ შეუერთდება.