სსფ-ის დირექტორი: AI ახალგაზრდებს კარიერული წინსვლის გზას უკეტავს

საერთაშორისო სავალუტო ფონდის მმართველმა დირექტორმა კრისტალინა გეორგიევამ სამუშაო ადგილებისთვის ხელოვნურ ინტელექტს „ცუნამი“ უწოდა. მან ეს ბანგკოკში გამართულ საუბარში თქვა. ტაილანდი 12-18 ოქტომბერს საერთაშორისო სავალუტო ფონდისა და მსოფლიო ბანკის ყოველწლიურ შეხვედრებს მასპინძლობს.

გეორგიევამ ორშაბათს პანელურ დისკუსიაზე განაცხადა, რომ ხელოვნურ ინტელექტში ინვესტიციები გლობალური ზრდის შენარჩუნებას უწყობს ხელს. თუმცა, მისი თქმით, ძლიერი ეკონომიკა აუცილებლად უკეთეს კარიერულ პერსპექტივებს არ ნიშნავს, განსაკუთრებით ახალგაზრდებისთვის.

გეორგიევამ თქვა: „არიან ისინი, ვინც ხელოვნური ინტელექტისთვის ინფრასტრუქტურას ქმნის. ბევრი მათგანი აზიაშია, მათ შორის, ტაილანდში. სწორედ უფრო მაღალ სიჩქარეზე ეს გადასვლა ინარჩუნებს მსოფლიო ეკონომიკის ზრდას 3%-ზე, დაახლოებით 3%-ზე, მიუხედავად იმისა, რომ ენერგომომარაგების შოკი ზრდას აფერხებს“.

საერთაშორისო სავალუტო ფონდის შეფასებით, ხელოვნური ინტელექტი მსოფლიოში სამუშაო ადგილების დაახლოებით 40%-ზე იმოქმედებს. მოწინავე ეკონომიკებში ეს მაჩვენებელი 60%-მდე გაიზრდება. ზოგი სამუშაო გაუმჯობესდება, ზოგის მნიშვნელობა შემცირდება, ზოგი კი გაქრება.

გეორგიევამ თქვა: „როცა ამას ვაკვირდებით, ვხვდებით, რომ უპირველესად შრომის ბაზარზე შემომავალი ახალგაზრდების გამო უნდა ვინერვიულოთ“.

გეორგიევამ განმარტა: „ჩვეულებრივ, ისინი ასეთ რუტინულ, განმეორებით სამუშაოებს იწყებდნენ და შემდეგ თანამდებობრივად წინ მიიწევდნენ. მაგრამ თუ ეს სამუშაოები გაქრება, არა მგონია, რომელიმე ახალგაზრდას ყავის მაღაზიაში ბარისტობა თავის პროფესიულ მომავალად სურდეს“.

LinkedIn-ის აღმასრულებელმა დირექტორმა ანიშ რამანმა ხელოვნური ინტელექტის ეპოქაში კარიერული კიბე ადრე „საცოც კედელს“ შეადარა. მისი თქმით, ის სწორხაზოვანი დაწინაურების ნაცვლად გვერდით გადაადგილებას მოითხოვს. ადამიანური რესურსების სტრატეგმა ცოტა ხნის წინ Business Insider-საც განუცხადა, რომ თანამშრომლები რბილი უნარებისა და შესაძლებლობების მიხედვით უნდა დაიქირაონ. მისი თქმით, არჩევანი აღარ უნდა ეფუძნებოდეს იმას, შეუძლია თუ არა ადამიანს კრებსითი ცხრილის შექმნა.

გეორგიევამ განაცხადა, რომ ხელოვნური ინტელექტის მიერ შრომის ბაზრის შეცვლის გამო მთავრობებს დაბეგვრისა და განათლების გადახედვა დასჭირდებათ.

გეორგიევამ თქვა: „ტრადიციულად, მთავრობები შემოსავლებს ძირითადად ადამიანების დაბეგვრით იღებდნენ. თუ ხელოვნური ინტელექტი შრომის ბაზრის სტრუქტურას შეცვლის და ნაკლები შრომა და მეტი კაპიტალი იქნება, რას დავბეგრავთ?“

გეორგიევამ დასძინა: „მთავრობებმა უნდა გააცნობიერონ, რომ უზარმაზარი პასუხისმგებლობა აკისრიათ. მათ უნდა გადახედონ, როგორი უნდა იყოს განათლება ხელოვნური ინტელექტის სამყაროში. ასევე უნდა ვაღიაროთ, რომ ერთ უნარს ვეღარ შევიძენთ და მთელი სიცოცხლე ვერ შევინარჩუნებთ. მთელი ცხოვრების განმავლობაში სწავლა უმნიშვნელოვანესი აუცილებლობაა“.