Starlink-ის შეზღუდვამ ევროპაში სუვერენიტეტზე კამათი გააღვივა

უკრაინის ცნობით, სიგნალების შენელება ოთხშაბათის ღამეს გაფრთხილების გარეშე ამოქმედდა და ერთ დღეზე ოდნავ მეტხანს გაგრძელდა. ტექნიკური სიჩქარის შეზღუდვის გამო საფრენი აპარატები კავშირს მყისიერად კარგავდნენ, როგორც კი 160 კმ/სთ-ზე სწრაფად მოძრაობდნენ.

შემთხვევამ ბრიუსელში დიდი გამოხმაურება გამოიწვია და ევროპის უსაფრთხოების სისტემის სტრატეგიული სისუსტეები გამოავლინა. ლიბერალმა ფრანგმა ევროპარლამენტარმა კრისტოფ გრუდლერმა პოლიტიკოს (Politico) განუცხადა, რომ უკრაინის თავდაცვა და, შესაბამისად, მთელი ევროპის უსაფრთხოება ერთი ამერიკელი მილიარდერის კეთილ ნებაზე ან ვაშინგტონის პოლიტიკურ გადაწყვეტილებებზე არ უნდა იყოს დამოკიდებული.

კონსერვატორმა ფინელმა ევროპარლამენტარმა აურა სალამ სოციალურ ქსელებში სახიფათო ტექნოლოგიური დამოკიდებულებების სწრაფად შემცირებაც მოითხოვა. მისი თქმით, უკრაინა აჩვენებს, რამდენად დაუცველია ევროპული თავდაცვის სისტემები, როდესაც ისინი ამერიკულ ტექნოლოგიას ეფუძნება. აშშ-ში ზოგიერთმა სენატორმა შეზღუდვის ოფიციალური გამოძიება მოითხოვა.

ამავდროულად, ევროპელი პოლიტიკოსები უკრაინისთვის ევროკავშირის პროგრამა Govsatcom-ში დაჩქარებულ ჩართვას ითხოვენ. პროგრამა მონაწილე სახელმწიფოებს დაცულ საკომუნიკაციო შესაძლებლობებს სთავაზობს. მოლაპარაკებები მარტიდან მიმდინარეობს, თუმცა გარღვევის გარეშე. ნორვეგიამ და ისლანდიამ კი შესაბამისი შეთანხმებების სწრაფად გაფორმება შეძლეს.

ამასთან, ევროპული სატელიტური ქსელ IRIS²-ის შექმნის მკვეთრად დაჩქარების მოთხოვნაც ისმის. სისტემა Starlink-ის ევროპულ ალტერნატივად განიხილება, თუმცა მოქმედი გრაფიკით ის სრულად მხოლოდ 2030 წელს ამუშავდება. გასულ წელს კომპანია Eutelsat-მაც უკრაინაში Starlink-ის ჩანაცვლება შესთავაზა.

ბრიუსელში ასევე იზრდება მზადყოფნა, რომ დედამიწის დაბალ ორბიტაზე უცხოელი მომწოდებლების საბაზრო წილი რეგულაციებით შეიზღუდოს. გერმანელი სოციალ-დემოკრატი ევროპარლამენტარი მათიას ეკე და სხვა დეპუტატები ევროპელი ოპერატორების გაძლიერებას ცდილობენ. რამდენიმე პარლამენტარი ევროპულ სატელეკომუნიკაციო კომპანიებს მოთხოვნადი სიხშირეების მოპოვებაში ეხმარება. ეს სიხშირეები მომავალ წლამდე ამერიკელ ოპერატორებზეა ლიცენზირებული და მათი მიღება მასკსაც სურს.

ევროკომისიის პრესსპიკერმა დაადასტურა, რომ კიევის Govsatcom-თან სრულად დასაკავშირებლად ინტენსიური მოლაპარაკებები მიმდინარეობს. მისი თქმით, ომი აჩვენებს, რომ ევროპის უსაფრთხოება კოსმოსზეცაა დამოკიდებული. უკრაინა ევროკავშირის ცალკეულ სახელმწიფოებთან, მათ შორის საფრანგეთთან, ორმხრივი შეთანხმებების გაფორმებასაც ცდილობს. სამხედრო ხელმძღვანელობა შეზღუდვების სამუდამოდ გაუქმებას იმედოვნებს. უკრაინის პრეზიდენტმა ვოლოდიმირ ზელენსკიმ თეთრი სახლიდან მიღებულ სიგნალებზე მიუთითა, რომელთა თანახმადაც უკრაინის შეიარაღებულ ძალებს სრული შესაძლებლობები აღუდგებოდა.