სუდანისა და სამხრეთ სუდანის სადავო რეგიონში დრონების თავდასხმას 153 ადამიანი ემსხვერპლა

აბიეის ადმინისტრაციის ინფორმაციის მინისტრის მოვალეობის შემსრულებელმა სამშაბათს თავდასხმაში სუდანის არმია დაადანაშაულა. თავდასხმა ერთი დღით ადრე, აბიეის დასახლების ჩრდილოეთით მდებარე ამიეტის ბაზარში მოხდა.

იოჰანა აკოლ ნგორის თქმით, ადგილზე ხანძარი კვლავ მძვინვარებდა და დაღუპულთა რაოდენობა, სავარაუდოდ, გაიზრდებოდა.

იოჰანა აკოლ ნგორმა როიტერსს უთხრა, რომ ვითარება საშინელი იყო. მისი თქმით, ზოგიერთი ცხედარი ფერფლად დაიწვა.

სამხრეთ სუდანის საგარეო საქმეთა და საერთაშორისო თანამშრომლობის სამინისტრომ სუდანის არმია თავდასხმაში დაადანაშაულა და განაცხადა, რომ დრონები ბაზრის რამდენიმე ადგილს დაეცა. სამინისტრომ სუდანის ელჩი დაიბარა და ჩრდილოელ მეზობელს მოუწოდა, თავი შეეკავებინა ისეთი ქმედებებისგან, რომლებიც მშვიდობიანი მოსახლეობის სიცოცხლესა და ქონებას საფრთხეს უქმნის.

სუდანის შეიარაღებულ ძალებს ამ დრომდე კომენტარი არ გაუკეთებიათ.

სუდანის მაღალჩინოსანმა, რომელმაც ანონიმურობის პირობით ასოშიეიტედ პრესს ესაუბრა, განაცხადა, რომ არმიამ სამხრეთ სუდანიდან მომავალ საწვავის ცისტერნებს დაარტყა. ცისტერნები გასამხედროებული სწრაფი მხარდაჭერის ძალებისკენ (RSF) მიემართებოდა.

მისი თქმით, თავდასხმის შედეგად დაღუპულები RSF-ის წევრები და საწვავის კონტრაბანდისტები იყვნენ. მან დასძინა, რომ სამხედროები მშვიდობიან მოსახლეობას არ ესხმიან თავს.

ანონიმურმა დიპლომატებმა როიტერსს განუცხადეს, რომ დარტყმა ბაზარში მდებარე საწვავის საწყობს მოხვდა, რომელსაც RSF წარსულში მებრძოლების მომარაგებისთვის იყენებდა.

RSF-ს თავდასხმაზე ამ დრომდე კომენტარი არ გაუკეთებია.

გაეროს გენერალური მდივნის პრესსპიკერმა, სტეფან დუჟარიკმა, სამშაბათს განცხადებაში ამიეტის ბაზართან და ტოდაჩთან დრონებით თავდასხმები დაგმო. მისი თქმით, დაიღუპა ათობით მშვიდობიანი მოქალაქე, მათ შორის ქალები და ბავშვები, მრავალი ადამიანი კი დაიჭრა. განცხადებაში თავდასხმების ავტორი დასახელებული არ ყოფილა.

გაეროს ცნობით, ბევრი ადამიანი კვლავ დაკარგულად ითვლება. გაეროს აბიეის დროებითი უსაფრთხოების ძალები (UNISFA) მსხვერპლის გადამოწმებას აგრძელებენ, ამიტომ დაღუპულთა რაოდენობა, სავარაუდოდ, გაიზრდება.

სამედიცინო საქველმოქმედო ორგანიზაციამ, „ექიმები საზღვრებს გარეშე“ (MSF), განაცხადა, რომ 20-ზე მეტ დაჭრილს მკურნალობდა, მათგან ზოგიერთს მძიმე დამწვრობა ჰქონდა.

სუდანის არმიასა და RSF-ს შორის ომი 2023 წლის აპრილში დაიწყო და ქვეყანაში გამანადგურებელი ჰუმანიტარული კრიზისი გამოიწვია.