Tesla-მ ევროპაში მართვის დამხმარე სისტემას სახელი შეუცვალა

ბოლო პერიოდში Tesla სისტემას „სრულად თვითმართვად სისტემას, ზედამხედველობით“ უწოდებდა. გერმანიაში სახელი ითარგმნებოდა, როგორც „სრულად დამოუკიდებელი მართვა, ზედამხედველობით“. წლებია, Tesla-ს ადანაშაულებენ, რომ ეს სახელი ავტონომიურ მართვას ჰპირდება მომხმარებლებს. სინამდვილეში, მძღოლი მუდმივად მზად უნდა იყოს ავტომობილის სამართავად და პასუხისმგებლობაც მას ეკისრება. სასამართლო დავების შემდეგ Tesla-მ მართვის საბაზისო დამხმარე ტექნოლოგიის თავდაპირველი სახელწოდება „ავტოპილოტი“ გააუქმა. საკუთარ ბაზარზე, აშშ-ში, Tesla კვლავ „სრულად თვითმართვად სისტემას, ზედამხედველობით“ იყენებს, მიუხედავად იმისა, რომ ეს სახელწოდება იქაც კამათს იწვევს.

სახელწოდება „სრულად თვითმართვადი სისტემა“ Tesla-ს ხელმძღვანელის, ილონ მასკის დაპირებებს უკავშირდება, რომ კომპანიის ავტომობილები ავტონომიური გახდებოდა. მასკი ამას უკვე ათი წელია, უახლოესი მომავლისთვის აანონსებს. თუმცა Tesla-მ საჭისა და პედლების გარეშე რობოტაქსის წარმოება მხოლოდ ახლახან დაიწყო. კომპანია აშშ-ში რამდენიმე თვითმართვად ავტომობილსაც იყენებს. ამასთან, Tesla-ს აშშ-ის საგზაო მოძრაობის ზედამხედველ ორგანოსთან უთანხმოება აქვს. წესები, სხვა მოთხოვნებთან ერთად, ფიზიკურ სამუხრუჭე პედალს ითვალისწინებს, Tesla-ს კი გამონაკლისის დაშვება არ მოუთხოვია.

პირველი კრიტიკის შემდეგ Tesla-მ სისტემის სახელწოდებას მისი ამჟამინდელი მდგომარეობის აღსანიშნავად სიტყვა „ზედამხედველობით“ დაუმატა. ჩანაფიქრის მიხედვით, ეს სიტყვა გაქრება, როცა ადამიანის ზედამხედველობა საჭირო აღარ იქნება. ამავე დროს, ზოგი ექსპერტი და კონკურენტი ავტონომიური მართვის შესახებ მასკის ხედვას პრინციპულად ეჭვქვეშ აყენებს.

მასკი დაჟინებით მოითხოვს, რომ თვითმართვადი ავტომობილები მხოლოდ კამერებს იყენებდნენ. კონკურენტები, მათ შორის Google-ის მონათესავე კომპანია Waymo, რადარის სენსორებსა და ლაზერულ რადარებსაც იყენებენ. ისინი ავტომობილების გარემოს ფართო არეალში სკანირებენ. Tesla-ს მიდგომის კრიტიკოსები აღნიშნავენ, რომ ცუდი ხილვადობის ან კაშკაშა მზის დროს კამერები საკმარის უსაფრთხოებას ვერ უზრუნველყოფს.

Tesla-ს სისტემა, რომელსაც ევროპაში ახლა „დახმარებით მართვა“ ეწოდება, ჯერჯერობით ევროპის მხოლოდ რამდენიმე ქვეყანაშია დაშვებული. ავტომწარმოებელი უკვე დიდი ხანია, ევროპაში ერთიანი ნებართვის მოპოვებას ცდილობს. გერმანიის ტრანსპორტის ფედერალურმა მინისტრმა შტეფენ ბილგერმა (Steffen Bilger) რამდენიმე დღის წინ განაცხადა, რომ Tesla-სთან ტექნიკურ და პასუხისმგებლობის საკითხებზე „კონსტრუქციული შეთანხმების“ შემდეგ საერთო ევროპულ ნებართვას მხარს უჭერს. შეთანხმების თანახმად, დამხმარე სისტემას დასაშვები მაქსიმალური სიჩქარის არაუმეტეს 10%-ით გადაჭარბება შეეძლება. საჭესთან მყოფი ადამიანები კი „ავტომობილის უსაფრთხო მართვაზე 100%-ით პასუხისმგებელი“ დარჩებიან. სამინისტროს ცნობით, Tesla-მ თავად შესთავაზა სისტემისთვის სახელის „დახმარებით მართვად“ შეცვლა.