ტრამპის ადმინისტრაცია ორბანს გაეროს გენერალურ მდივნად განიხილავს

უნგრეთის ყოფილი პრემიერ-მინისტრი ვიქტორ ორბანი იმ კანდიდატებს შორისაა, რომლებსაც ტრამპის ადმინისტრაცია გაეროს გენერალური მდივნის პოსტზე განიხილავს. ამის შესახებ „უოლ-სტრიტ ჯორნალი“ (The Wall Street Journal) წერს. გამოცემის ცნობით, ვაშინგტონმა უნგრეთის ლიდერს ჰკითხა, თანახმა იქნებოდა თუ არა, კენჭი ეყარა აშშ-ის, რუსეთისა და ჩინეთის ერთობლივი მხარდაჭერით.

ამერიკელმა ოფიციალურმა პირებმა ეს შესაძლებლობა მოსკოველ და პეკინელ კოლეგებთან შეხვედრებზე წამოაყენეს. მათ ორბანის კანდიდატურას, სავარაუდოდ, დადებითად შეხვდნენ. უნგრეთის ყოფილი პრემიერ-მინისტრი ამ შესაძლებლობის მიმართ ღია იყო, თუმცა არჩევნებში მონაწილეობას არ აპირებს, თუ წარმატების რეალური შანსი არ ექნება.

ამერიკული გაზეთის ცნობით, პრეზიდენტი დონალდ ტრამპი და ვიცე-პრეზიდენტი ჯეი დი ვენსი მზად არიან, ორბანის კანდიდატურას ოფიციალურად დაუჭირონ მხარი. განცხადებას, სავარაუდოდ, ნოემბერში, აშშ-ის შუალედური არჩევნების შემდეგ გააკეთებენ. „უოლ-სტრიტ ჯორნალის“ ცნობით, სახელმწიფო დეპარტამენტის ერთ-ერთი ოფიციალური პირის აზრით, ორბანმა უშიშროების საბჭოში სულ მცირე რვა ხმა შეიძლება მიიღოს, ხოლო საბოლოოდ, შესაძლოა, ათამდე ხმა მოაგროვოს.

თუმცა, ორბანის არჩევის შანსებთან დაკავშირებით მნიშვნელოვანი გაურკვევლობა რჩება. კანდიდატურის დამტკიცებას უშიშროების საბჭოს თანხმობა სჭირდება. საბჭოს ხუთი მუდმივი წევრიდან თითოეულს, აშშ-ს, რუსეთს, ჩინეთს, საფრანგეთსა და გაერთიანებულ სამეფოს, ვეტოს უფლების გამოყენება შეუძლია. პარიზი და ლონდონი შესაძლოა უნგრეთის ყოფილი ლიდერის კანდიდატურას შეეწინააღმდეგონ, რაც შეთანხმების მიღწევას გაართულებს.