წამყვანმა ჩოგბურთელებმა დიდ სლემებთან დავაში ზავი დადეს

18-თვიანი კამპანია აშშ-ის ღია პირველობის შემდეგ დასრულდა

სინერი და საბალენკა წამყვან მოთამაშეებს შორის ყველაზე აქტიურები იყვნენ

მსოფლიოს წამყვანი ჩოგბურთელები დიდი სლემის ტურნირებს შეუთანხმდნენ და პრიზების, კეთილდღეობისა და მოთამაშეებთან კონსულტაციების საკითხებზე ხანგრძლივ დავაში ზავი დადეს.

მოთამაშეებმა კვირას, აშშ-ის ღია პირველობის კაცთა ფინალის შემდეგ გავრცელებულ განცხადებაში 18-თვიანი კამპანიის შეწყვეტის შესახებ გამოაცხადეს. ისინი დიდი სლემის ტურნირების წინააღმდეგ აქტიურობდნენ. კამპანიის კულმინაცია წელს როლან გაროსზე მედიის ბოიკოტი იყო, რომლის გეგმაც პირველად მაისში გასაჯაროვდა.

უიმბლდონზე დაგეგმილი მსგავსი ბოიკოტი გაუქმდა, მას შემდეგ, რაც სრულიად ინგლისის საჩოგბურთო კლუბმა (All England Lawn Tennis Club) დათმობებზე წასვლა გადაწყვიტა.

იანიკ სინერი და აშშ-ის ღია პირველობის ფინალისტი არინა საბალენკა გასახდელის მოთამაშეთა სახელით ყველაზე აქტიურად ლობირებდნენ. კარლოს ალკარასი კამპანიას გასულ თვეში გამოეთიშა.

მოთამაშეები ოთხი მთავარი ტურნირის შემოსავლიდან პრიზებისთვის მეტი წილის გამოყოფას მოითხოვდნენ. ისინი ასევე დიდი სლემის ტურნირებისგან მოთამაშეთა კეთილდღეობისა და საპენსიო უზრუნველყოფის დაფინანსებას ითხოვდნენ. კიდევ ერთი მოთხოვნა მოთამაშეთა საბჭოს შექმნა და გადაწყვეტილებების მიღებაში ოფიციალური როლის მიღება იყო.

აგვისტოში ცნობილი გახდა, რომ ოთხივე ტურნირი დიდი სლემის მოთამაშეთა მრჩეველთა საბჭოს შექმნას დათანხმდა. როგორც ჩანს, მოთამაშეთა დაბრუნებისთვის ამ ნაბიჯს გადამწყვეტი მნიშვნელობა ჰქონდა.

მოთამაშეთა განცხადებაში ნათქვამია: „ახლა, როდესაც ამ სამუშაოს გასაგრძელებლად ოფიციალური საბჭო არსებობს, წამყვან მოთამაშეთა ერთიანი ჯგუფის მიერ წარმართული კამპანიის საჯარო ეტაპი სრულდება“.

მოთამაშეებმა განაცხადეს: „თუ საბჭო ამ მიზნებს ვერ მიაღწევს, მოთამაშეები კამპანიის განახლების უფლებას იტოვებენ. ამ ეტაპზე კამპანიაში ჩართული მოთამაშეები, როგორც ერთიანი ჯგუფი, ამ საკითხებზე დამატებით საჯარო კომენტარს აღარ გააკეთებენ.

მოთამაშეები ახლა საბჭოს შესაქმნელად უშუალოდ დიდი სლემის ტურნირებთან იმუშავებენ. საბჭოს მეშვეობით მოთამაშეებთან პირდაპირ კონსულტაციებს გამართავენ და მათ მუდმივ მოლაპარაკებებში მონაწილეობა შეეძლებათ“.

მოთამაშეთა განცხადებაში ნათქვამია, რომ კამპანიის სამივე მიმართულებით წარმატებას მიაღწიეს. აშშ-ის ჩოგბურთის ასოციაცია (US Tennis Association) წელს აშშ-ის ღია პირველობაზე მოთამაშეთა კეთილდღეობისთვის 2 მილიონი დოლარის (1,48 მილიონი ფუნტის) გამოყოფას დათანხმდა. თუმცა დიდი სლემის ტურნირების შემოსავლების 22%-ის პრიზებისთვის გამოყოფის მიზანი ჯერ კიდევ მიუღწეველია.