უკრაინამ და რუსეთმა 270-270 სამხედრო ტყვე გაცვალეს

უკრაინამ და რუსეთმა პარასკევს 270-270 სამხედრო ტყვე გაცვალეს. ეს 19 აგვისტოს დაწყებული პროცესის მესამე ეტაპი იყო.

უკრაინის პრეზიდენტის, ვოლოდიმირ ზელენსკის განცხადებით, კიევში 261 სამხედრო მოსამსახურე და ცხრა მშვიდობიანი მოქალაქე დაბრუნდა.

ზელენსკიმ დასძინა: „გათავისუფლებულთა უმეტესობა ის მებრძოლებია, რომლებიც მარიუპოლს იცავდნენ. ასევე ბრუნდებიან დონეცკის, ლუგანსკის, ხარკოვის, ზაპოროჟიეს, ხერსონის, კიევის, მიკოლაევისა და ჩერნიგოვის მიმართულებებზე მებრძოლი დამცველები. ბევრი მათგანი რუსეთში უკანონოდ გაასამართლეს. დაბრუნებულთა შორის ხუთი ადამიანია, რომლებიც, სავარაუდოდ, 2022 წლის ივლისში, ოლენივკაში რუსეთის ტერორისტული თავდასხმის შედეგად დაიღუპნენ. ეს ძალიან მნიშვნელოვანი შედეგია“.

რუსეთის თავდაცვის სამინისტრომაც დაადასტურა გაცვლა და პარასკევს განაცხადა, რომ გაცვლის შედეგად გათავისუფლებული 270 რუსი ტყვე ბელარუსში იმყოფებოდა.

აშშ-ის პრეზიდენტ დონალდ ტრამპის ადმინისტრაციამ მაისში ტყვეთა გაცვლის შეთანხმებას შუამავლობა გაუწია. ზელენსკის მაშინდელი განცხადებით, პროცესის ფარგლებში სულ 2 000 სამხედრო ტყვე უნდა გაეცვალათ. გაცვლის ბოლო ეტაპი ოსლოსა და სანქტ-პეტერბურგში მოლაპარაკებების მორიგი რაუნდის დასრულებიდან მალევე გაიმართა.

უკრაინის სამხედრო ტყვეების საკითხებზე მომუშავე საკოორდინაციო შტაბმა განცხადებაში აღნიშნა: „მადლობას ვუხდით ამერიკის შეერთებულ შტატებსა და არაბთა გაერთიანებულ საამიროებს. განსაკუთრებულ მადლობას ვუხდით ყველას, ვინც სტივენ ჰაბარდის გათავისუფლებას შეუწყო ხელი. ის 74 წლის ინგლისურის მასწავლებელია იზიუმიდან, რომელიც რუსებმა უკანონოდ გაასამართლეს და აწამეს“.

ხელისუფლების ცნობით, უკრაინისთვის გადაცემული სამხედრო მოსამსახურეების უმეტესობა 2022 წლიდან იყო დაკავებული. ზოგიერთი მათგანი 2018 და 2020 წლებში, დონბასში ომის დროსაც კი დაატყვევეს.