უკრაინას Starlink-ზე სიჩქარის შეზღუდვა კვლავ არ მოუხსნეს

პარასკევს დილით უკრაინულ გადამჭრელ დრონებს კვლავ არ შეეძლოთ მაღალსიჩქარიანი ინტერნეტის გამოყენება რუსული თავდასხმის დრონების ჩამოსაგდებად ან ფრენისას ოპერაციების ჩასატარებლად. ამის შესახებ უკრაინელმა ოფიციალურმა პირებმა და დრონის ოპერატორმა განაცხადეს. ეს მოხდა მას შემდეგ, რაც აშშ-ის პრეზიდენტმა დონალდ ტრამპმა თქვა, რომ SpaceX-ის დამფუძნებელმა ილონ მასკმა თავის Starshield სერვისზე სიჩქარის შეზღუდვა მოხსნა.

უკრაინის მთავრობის წარმომადგენელმა, რომელმაც ვინაობის გამხელა არ ისურვა, პოლიტიკოს განუცხადა: „დილის ტესტები აჩვენებს, რომ 140-160 კმ/სთ სიჩქარის შეზღუდვა კვლავ მოქმედებს, ნავიგაცია კი გამართულად არ მუშაობს“.

თავდაცვის სამინისტროს წარმომადგენელმა პარასკევს ჟურნალისტებს უთხრა, რომ დილით 161 კმ/სთ სიჩქარეზე კავშირის დაკარგვის შემთხვევები კვლავ ფიქსირდებოდა. მისი თქმით, ამჟამად არ დასტურდება, რომ შეზღუდვები მოიხსნა.

უკრაინულმა დრონების დანაყოფებმა სიჩქარის შეზღუდვების გამოცდა ხუთშაბათს საღამოს დაიწყეს, მას შემდეგ, რაც ტრამპმა ჟურნალისტებს უთხრა, რომ მასკმა Starlink-ის მუშაობა აღადგინა. ზოგიერთმა ტესტმა შავ ზღვაზე 200 კმ/სთ-მდე სიჩქარე აჩვენა და გაუმჯობესება დააფიქსირა. თუმცა, 160 კმ/სთ-ის ზემოთ ფრენისას დრონები კვლავ სწრაფად კარგავდნენ სიგნალს.

უკრაინის წამყვანი დრონების დანაყოფის, „მაგიარის ჩიტების“ პილოტმა, რომლის მეტსახელია ლეონი, პოლიტიკოს განუცხადა: „მთავარი ისაა, რომ 180 კმ/სთ-ზე მეტ სიჩქარეს ვავითარებთ, რამდენიმე წუთი მივფრინავთ და კავშირი წყდება. სიჩქარე 140-150 კმ/სთ-მდე ეცემა, შემდეგ კი კავშირი აღდგება, მაგრამ მდგომარეობა უკეთესია“. პილოტმა დასძინა: „უკეთ მუშაობს, თუმცა კავშირი მუდმივად წყდება“.

Starshield-ზე, Starlink-ის სამხედრო მიზნებისთვის განკუთვნილ სერვისზე დაწესებულმა სიჩქარის შეზღუდვამ მნიშვნელოვანი ოპერაციები შეაფერხა და ნაწილობრივ გათიშა რუსული „შაჰედების“ წინააღმდეგ მოქმედი მნიშვნელოვანი დრონები.

მასკმა თქვა, რომ Starshield-ს აშშ-ის მთავრობა აკონტროლებს. აშშ-ის სახელმწიფო მდივანმა მარკო რუბიომ კი განაცხადა, რომ ადმინისტრაციას არ შეუძლია SpaceX-ს ან მასკს უკრაინაში Starlink-ის სერვისების შეზღუდვისა თუ შენელების მითითება მისცეს, რადგან კომპანია კერძოა.

უკრაინის პრეზიდენტმა ვოლოდიმირ ზელენსკიმ თქვა, რომ Starlink-ის შეზღუდვა წინასწარ დაგეგმილი ოპერაცია იყო, რომლის მიზანიც უკრაინის თავზე Starshield-ის მუშაობის სიჩქარის სპეციალურად შეზღუდვა გახლდათ. უკრაინის მთავრობამ განაცხადა, რომ რამდენიმე დღის განმავლობაში არ აუხსნეს, რატომ მოხდა ეს. თუმცა, უოლ სტრიტ ჯორნალმა ხუთშაბათს გაავრცელა ინფორმაცია, რომ ტრამპმა მასკს დაურეკა და შეზღუდვების მოხსნა სთხოვა.