ვესტ ჰემის ყოფილი თავდამსხმელი ანტონიო უოტფორდს შეუერთდა

უოტფორდმა (Watford) ვესტ ჰემ იუნაიტედის (West Ham United) ყოფილი თავდამსხმელის, მაიკლ ანტონიოს თავისუფალი აგენტის სტატუსით დამატება გამოაცხადა.

36 წლის ფეხბურთელმა ვესტ ჰემის ძირითად გუნდში ბოლო მატჩი 2024 წლის 3 დეკემბერს ჩაატარა, როცა გუნდი ლესტერ სიტისთან (Leicester City) 3:1 დამარცხდა. ოთხი დღის შემდეგ ანტონიო ავტოავარიაში მოჰყვა და ფეხი მოიტეხა.

ანტონიო ბოლოს აპრილში ყატარის ალ-საილიას (Al-Sailiya) შემადგენლობაში თამაშობდა და კლუბში სულ ოთხი მატჩი ჩაატარა. ბოლო ერთი თვის განმავლობაში ის ალესიო დიონისის გუნდთან ვარჯიშობდა და უოტფორდს ერთწლიანი კონტრაქტით შეუერთდა.

ანტონიომ კლუბის ვებსაიტს განუცხადა: „უოტფორდი დიდი კლუბია. იმედი მაქვს, გუნდს შევუერთდები, წარმატებას მოვუტან და ყველანაირად დავეხმარები“.

იამაიკის ნაკრების ფეხბურთელის ტრანსფერი საერთაშორისო ნებართვის მიღების პირობით გამოცხადდა. ნებართვა მას შაბათს ჩემპიონშიფში სტოკ სიტისთან (Stoke City) საშინაო მატჩის განაცხადში მოხვედრის საშუალებას მისცემს.

ანტონიომ ვესტ ჰემში 10 წელი გაატარა, კლუბმა კი ის 2025 წლის ივნისში გაუშვა. რეაბილიტაციის ფარგლებში თავდამსხმელი კლუბში დაბრუნდა და პრემიერ-ლიგა 2-ში 21-წლამდელთა გუნდის შემადგენლობაში ორი მატჩი ჩაატარა.

გასული წლის დეკემბერში ანტონიო ლესტერ სიტისთან ვარჯიშობდა. ის ბრენტფორდში (Brentford) გადასვლასთანაც ახლოს იყო, თუმცა კონტრაქტის ხელმოწერამდე ერთი დღით ადრე წვივის კუნთი გაიწყვიტა და გარიგება ჩაიშალა.

2015 წლის სექტემბერში ვესტ ჰემში გადასვლამდე ანტონიო ინგლისის საფეხბურთო ლიგაში თამაშობდა. მის კლუბებს შორის რედინგი (Reading), შეფილდ უენსდეი (Sheffield Wednesday) და ნოტინგემ ფორესტი იყო.

ვიკარიჯ როუდზე (Vicarage Road) ანტონიო 18-ნომრიან მაისურს მოირგებს. ის უოტფორდის ზაფხულის მე-12 შენაძენია.

დიონისის ხელმძღვანელობით უოტფორდმა საწყისი ექვსი მატჩიდან ორი მოიგო, ორი ფრედ დაასრულა და ორი წააგო. გუნდი ლიგაში მე-12 ადგილზეა.