WhatsApp ანგარიშის გარეშე ზარებზე სტუმრების მიწვევას ამატებს

WhatsApp-ის სტუმრის რეჟიმით დარეკვის ახალი ფუნქცია მომხმარებელს საშუალებას აძლევს, ზარზე ნებისმიერი ადამიანი ანგარიშის წინასწარ შექმნის გარეშე მიიწვიოს. სტუმრებს არც აპი დასჭირდებათ, რადგან Meta-მ წლის დასაწყისში WhatsApp-ის ვებვერსიაში ზარების მხარდაჭერაც დაამატა. მომხმარებელს სტუმრების მიწვევა ზარის ბმულის გაგზავნით შეუძლია. სტუმრებისთვის ხელმისაწვდომია ხელის აწევა, ეკრანის გაზიარება და ემოჯით რეაქციები. ზარი გამჭოლად დაშიფრულია.

თუმცა, ზარის დასაწყებად ანგარიში კვლავ საჭიროა. სტუმრებისთვის რამდენიმე შეზღუდვაც მოქმედებს:

სტუმრის სტატუსით შემოერთებულ ნებისმიერ ადამიანს ზარის მასპინძლის თანხმობა ყოველთვის სჭირდება. სტუმრები მოსაცდელ სივრცეში ხვდებიან, ვიდრე მასპინძელი მათ ზარზე დაუშვებს. მასპინძელს მათი ზარიდან ნებისმიერ დროს გათიშვა შეუძლია. სტუმრები სხვა მონაწილეების ტელეფონის ნომრებს ვერ ხედავენ, შეტყობინებებს ვერ აგზავნიან და ზარზე სხვა ადამიანებს პირდაპირ ვერ ამატებენ.

Meta-ს განცხადებით, კომპანია WhatsApp-ის ზარებისთვის Google-ისა და Outlook-ის კალენდრებთან ინტეგრაციას წლის ბოლოს დაამატებს. WhatsApp-ის დამატების დაყენებისა და ანგარიშის დაკავშირების შემდეგ მომხმარებლები კალენდრის მოსაწვევებთან ერთად WhatsApp-ის ზარის ბმულის გაგზავნას შეძლებენ.