WhatsApp-ის ყალბი აპი 500 000 მომხმარებელმა ჩამოტვირთა

მავნე პროგრამების დიდი ნაწილი სმარტფონებსა და სხვა მოწყობილობებში ხვდება, როცა მომხმარებლები საეჭვო ვებსაიტებიდან ყალბ აპებს ჩამოტვირთავენ. მაგრამ რა ხდება, როცა მოჩვენებით დაცული სივრცე, მაგალითად Google Play Store, უცებ ნამდვილს მიმსგავსებულ აპებს აჩვენებს და მათ პოპულარიზაციასაც უწევს? ასე მოხდა აპის შემთხვევაში, რომელიც WhatsApp-ად ასაღებდა თავს და მრავალ მომხმარებელს მახეში აბამდა.

WhatsApp-ის ყალბი აპი ჯერ Reddit-ის მომხმარებელმა აღმოაჩინა და გამოაქვეყნა. ყალბ აპს Meta-ს ორიგინალის იდენტური სახელი და ხატულა ჰქონდა. აპების მაღაზიის გვერდზე აღწერებიცა და ეკრანის ანაბეჭდებიც ზუსტად ემთხვეოდა. აღმოჩენის მომენტში ყალბი WhatsApp ნამდვილ აპზე წინაც კი ჩანდა, რადგან მის უკან მდგომმა პირებმა სპონსორობაში ფული გადაიხადეს. შედეგად, აპი ძიების შედეგებში პირველ ადგილზე აღმოჩნდა.

გამოაშკარავების თავიდან ასაცილებლად, ყალბი WhatsApp-ის უკან მდგომმა პირებმა ხრიკს მიმართეს. მათ აპი Google Play Store-ის ბეტაპროგრამაში განათავსეს. ამის გამო მომხმარებლებს საჯარო შეფასებების დატოვება არ შეეძლოთ. ასე ყალბ აპს უარყოფითი შეფასებებით თავის გამორჩევის საფრთხე აღარ ემუქრებოდა.

განსხვავებები მხოლოდ მაშინ ჩანდა, თუ მომხმარებელი ყურადღებით დააკვირდებოდა. ყალბ WhatsApp-ს დეველოპერად „Agment Assets sallu“ ჰყავდა მითითებული. ჩამოტვირთვების რაოდენობაც ორიგინალზე გაცილებით ნაკლები იყო. Meta-ს WhatsApp-ს 10 მილიარდზე მეტი ჩამოტვირთვა აქვს, ყალბმა ვერსიამ კი „მხოლოდ“ ნახევარი მილიონი დააგროვა. თუმცა, რადგან ეს პოტენციურად მავნე აპია, საფრთხე ყველა იმ ადამიანს ემუქრება, ვისაც ის ჩამოტვირთული აქვს.

Google-მა ყალბ აპზე რეაგირება უკვე მოახდინა და Play Store-იდან წაშალა როგორც თავად აპი, ისე დეველოპერის ანგარიში. შესაბამისად, მომხმარებლებს ამ დროისთვის ყალბი WhatsApp-ის შემთხვევით ჩამოტვირთვის საფრთხე აღარ ემუქრებათ. მიუხედავად ამისა, ჩამოტვირთვისას მომხმარებლებმა უნდა შეამოწმონ, რომ აპის დეველოპერია „WhatsApp LLC“ და გვერდზე ჩანს შეფასებები და მილიარდობით ჩამოტვირთვა.

ამჟამად უცნობია, კონკრეტულად რა მიზანი აქვს აპს და რას აკეთებს ის მოწყობილობებში. ვერჯის ცნობით, Google-ს ამ შემთხვევაზე კომენტარი ჯერ არ გაუკეთებია. შესაძლოა, საქმე ინფორმაციის მომპარავ პროგრამასთან გვქონდეს, რომელიც ფონურ რეჟიმში შეუმჩნევლად აგროვებს და იტაცებს სენსიტიურ მონაცემებს. ან აპი მხოლოდ საშუალებაა მოწყობილობებში სხვა მავნე პროგრამების ჩასატვირთად.

ნებისმიერ შემთხვევაში, ყველა, ვისაც აპი ჩამოტვირთული აქვს, რაც შეიძლება სწრაფად უნდა წაშალოს. თუ სმარტფონზე ანტივირუსული პროგრამაა დაყენებული, ღირს მთელი მოწყობილობის შემოწმება. ვისაც ასეთი პროგრამა არ აქვს, შეუძლია Avast-ის ან Avira-ს უფასო აპები გამოიყენოს. მაშინაც კი, თუ შემოწმებისას არაფერი აღმოჩნდა, უნდა შეიცვალოს ის ანგარიშების მონაცემები და პაროლები, რომლებსაც მომხმარებელი ყალბი აპის ჩამოტვირთვის შემდეგ სმარტფონზე იყენებდა. ამის შემდეგაც დაზარალებულებმა ანგარიშებს უნდა მიადევნონ თვალი და უნებართვო წვდომას დააკვირდნენ.