ზელენსკი: რუსეთის გამარჯვებამ ევროპაში 20 მილიონი უკრაინელი შეიძლება გააქციოს

ზელენსკიმ პარასკევს, ევროკავშირის ლიდერთა სამიტზე გამართულ პრესკონფერენციაზე, ჟურნალისტებს უთხრა: „რუსეთი გვკლავს“. მან დასძინა, რომ უკრაინელებს საკუთარი ქვეყნიდან „აძევებენ“. ზელენსკიმ თქვა: „მათ [რუსეთს] გაჩერება არ სურთ“.

რუსეთის სრულმასშტაბიანი შეჭრის პირველ დღეებში მილიონობით უკრაინელმა სახლი დატოვა. ეს ევროპაში მეორე მსოფლიო ომის შემდეგ ყველაზე სწრაფი და მასშტაბური ლტოლვილთა კრიზისი იყო. ევროსტატის (Eurostat) მონაცემებით, დღეს ევროკავშირის ქვეყნებში დროებითი დაცვის სტატუსით 4 მილიონზე მეტი უკრაინელი ცხოვრობს. მათი ყველაზე დიდი ჯგუფები გერმანიაში, პოლონეთსა და ჩეხეთში იმყოფებიან.

ზელენსკის მკაცრი გაფრთხილება იმ დროს გაისმა, როცა რუსეთის დაბომბვის ფონზე უკრაინა ომის მეხუთე მძიმე ზამთრისთვის ემზადება. საერთაშორისო სავალუტო ფონდის პროგნოზებით, მომავალ წელს კიევს 30-დან 35 მილიონ დოლარამდე საბიუჯეტო დეფიციტი ექნება. პროგნოზი ითვალისწინებს 90 მილიარდი ევროს სესხსაც, რომლის გამოყოფასაც ბრიუსელი გასულ წელს დათანხმდა.

უკრაინის პრეზიდენტი ბრიუსელში ევროპელ ლიდერებთან შესახვედრად და ომით დაზარალებული ქვეყნის ფინანსური მხარდაჭერის გასაძლიერებლად ჩავიდა. ევროკავშირი უკრაინის ყველაზე მტკიცე მხარდამჭერია. თუმცა, გაერთიანების პრიორიტეტებს შორისაა ენერგიის მზარდი ხარჯები, მოახლოებული არჩევნები, გეოპოლიტიკური კრიზისები და ჩიხი, რომელშიც მისი 2 ტრილიონი ევროს ბიუჯეტის განხილვა შევიდა.