Amazon მონაცემთა ცენტრებთან მცხოვრებთათვის 1 მილიარდ დოლარს გამოყოფს

Amazon Web Services-ის (AWS) აღმასრულებელმა დირექტორმა მეტ გარმანმა დაწერა: „პროგრამის, „ერთად აშენებული“, მეშვეობით Amazon მომდევნო ხუთ წელიწადში ჩვენს ამჟამინდელ საქმიანობას 1 მილიარდ დოლარზე მეტს დაამატებს. თემები თავად განსაზღვრავენ, რა იქნება მათთვის ყველაზე სასარგებლო განათლების, პროფესიული მომზადების, ენერგიის ხელმისაწვდომობის, წყლისა და ენერგიის დაზოგვისა და ადგილობრივი პრიორიტეტების მიმართულებით“. გარმანის თქმით, Amazon მონაცემთა ცენტრებთან მცხოვრებთათვის სამ უმთავრეს საკითხზე ამახვილებს ყურადღებას. ესენია განათლებისა და დასაქმების შესაძლებლობები, ენერგიის ხელმისაწვდომობა და წყლის საკითხების მოგვარება, ასევე მოქნილი დაფინანსება, რომლის ადგილობრივ პრიორიტეტებსაც თემები განსაზღვრავენ.

კომპანიის განცხადებით, მონაცემთა ცენტრებთან მცხოვრებლები მოთხოვნად სფეროებში ორწლიანი კოლეჯის ხარისხის მიღებას პირადი ხარჯების გარეშე შეძლებენ. ფინანსური დახმარების მიღების შემდეგ დარჩენილ თანხას Amazon დაფარავს. კომპანიის მტკიცებით, მან ადგილობრივ საზოგადოებრივ კოლეჯებთან შეთანხმებები უკვე გააფორმა და პროგრამების დაწყებას უახლოეს თვეებში ელის. Amazon-ის მიზანი მონაცემთა ცენტრებთან მდებარე დასახლებებიდან 300 000-ზე მეტი სტუდენტისთვის უფასო უმაღლესი განათლების ხელმისაწვდომობაა. გარმანმა ასევე განაცხადა, რომ კომპანია მოდულური სასწავლო ცენტრების ქსელს აფართოებს. ცენტრები ხელობის სპეციალისტებს უფასო სასერტიფიკატო პროგრამებს სთავაზობენ, რათა ისინი საბოლოოდ Amazon-ში ან მის პარტნიორ სამშენებლო კომპანიებში დასაქმდნენ. კომპანია წელიწადში 100 000-მდე მუშაკის მომზადების დაფინანსებას გეგმავს.

Amazon მონაცემთა ცენტრებთან მდებარე დასახლებების სკოლებისთვის, საზოგადოებრივი შენობებისა და სახლებისთვის გრანტების გაცემასაც გეგმავს. თანხები ენერგოეფექტიანი მოწყობილობებისა და სისტემების დასამონტაჟებლად გამოიყოფა. მათ შორისაა თბური ტუმბოები, გათბობის, ვენტილაციისა და კონდიცირების სისტემები, თბოიზოლაცია, წყლის გამაცხელებლები, აკუმულატორები და მზის ენერგიის მოწყობილობები. პროგრამის მიზანი ელექტროენერგიის ღირებულების ყოველწლიურად დაახლოებით 20%-დან 40%-მდე შემცირებაა. ოჯახების ელექტროენერგიის წლიური ხარჯი შესაძლოა 700 დოლარამდე შემცირდეს. გარმანის თქმით, კომპანია ადგილობრივ არაკომერციულ ორგანიზაციებსა და საზოგადოებრივ ფონდებთანაც თანამშრომლობს. ამ გზით Amazon-ის მიერ გამოყოფილი თანხები მცხოვრებთა საჭიროებების შესაბამისად უნდა დაიხარჯოს. AWS-ის ხელმძღვანელმა თქვა: „ყველა თემი განსხვავებულია. სოფლის ტიპის ორეგონში უმთავრესი საკითხი განსხვავდება ვირჯინიის გარეუბნის ან ოჰაიოს საშუალო ზომის ქალაქის პრიორიტეტებისგან“.

გარმანმა განცხადების პირველ ნაწილში მონაცემთა ცენტრების მახლობლად მცხოვრებთა მრავალი შეშფოთება განიხილა. მან მათ „მცდარი“ და „შეცდომაში შემყვანი“ უწოდა, მიუხედავად სხვადასხვა ანგარიშისა, რომლებიც კომუნალური გადასახადების ზრდასა და ხმაურით დაბინძურებაზე მიუთითებს. მიუხედავად ამისა, ინიციატივები, როგორც ჩანს, ამ პრობლემების ნაწილობრივ შემსუბუქებასა და დაგეგმილი მონაცემთა ცენტრების ადგილობრივი თემებისთვის უფრო მისაღებად ქცევას ემსახურება. ეს განსაკუთრებით მნიშვნელოვანია, რადგან ხელოვნური ინტელექტის მონაცემთა ცენტრების ორპარტიული აკრძალვების გამო მრავალი პროექტი ყოვნდება. გამოკითხვებიც აჩვენებს, რომ ამერიკელთა უმრავლესობას საკუთარ საცხოვრებელთან მონაცემთა ცენტრის აშენება არ სურს.