Apollo-ს ეკონომისტი: ხელოვნურმა ინტელექტმა შესაძლოა ბანკებიდან ფული გაიტანოს

ტორსტენ სლოკის თეორია მოკლედ ასეთია: მომხმარებელი Meta-ს Muse-ის მსგავს ხელოვნური ინტელექტის აგენტს ეკითხება, როგორ მიიღოს საკუთარი ფულიდან მაქსიმალური შემოსავალი. აგენტი ხედავს, რომ ფული მიმდინარე ან შემნახველ ანგარიშებზე ინახება. მათი საშუალო წლიური შემოსავლიანობა ქვეყნის მასშტაბით, შესაბამისად, 0,1% და 0,4%-ია.

ასისტენტი ფულს უფრო მაღალი შემოსავლიანობის ანგარიშზე გადაიტანს ან მომხმარებელს ამის გაკეთებას ურჩევს. ასეთ ანგარიშებს ფინანსური ტექნოლოგიების კომპანია Adelphi სთავაზობს, რომლის ზოგიერთ ანგარიშზე წლიური შემოსავალი 5%-მდეა.

პრობლემა მაშინ იწყება, როდესაც ყველა მომხმარებლის ხელოვნური ინტელექტის აგენტი იმავეს აკეთებს. შედეგად, ბანკებიდან დიდი მოცულობის დეპოზიტები ავტომატურად და მოულოდნელად გაედინება და ფული სხვაგან გადადის.

სლოკმა კვირას გამოქვეყნებულ ანალიტიკურ წერილში დაწერა: „თუ ყველა ოჯახი ნაღდი ფულის ნაშთიდან შემოსავლის გასაზრდელად ხელოვნური ინტელექტის აგენტებს გამოიყენებს, ბანკებმა შესაძლოა დაკარგონ იაფი დეპოზიტების დიდი ნაწილი, რომელსაც სესხების გასაცემად ეყრდნობიან“.

აღსანიშნავია, რომ სლოკის კომპანია მართავს 849 მილიარდი დოლარის საკრედიტო ბიზნესს, რომელიც კომპანიების დაკრედიტებაში ბანკებს კონკურენციას უწევს. Apollo უკვე არასაბანკო დაკრედიტების უმსხვილესი მონაწილეა. კომპანიამ განაცხადა, რომ 2029 წლისთვის კერძო კრედიტის სახით 1,2 ტრილიონი დოლარის მართვას გეგმავს.

Apollo-ს პრესსამსახურმა Business Insider-ს განუცხადა, რომ დამატებითი კომენტარი არ ჰქონდა.

ბოლო კვირებში ინტერნეტში Muse-ისა და Instinct-ის მსგავსი პირადი ხელოვნური ინტელექტის აგენტები სწრაფად გავრცელდა. მომხმარებლები ასისტენტებს ყოველდღიური დავალებებისთვის, მათ შორის, სურსათის შესაკვეთად და კინოს ბილეთების საყიდლად იყენებენ.

Meta-სა და Instinct-ის დამფუძნებელ ნოა შინის Business Insider-ის მოთხოვნებზე დაუყოვნებლივ არ უპასუხიათ. გამოცემამ მათ კომენტარისთვის სამუშაო საათების შემდეგ მიმართა.

ბოლო დროს ასევე იმატა იმ ადამიანების რაოდენობამ, რომლებიც ამ ასისტენტებით საკუთარი ფინანსების ოპტიმიზაციას ცდილობენ.

თუმცა, ხელოვნური ინტელექტის ასისტენტების მოთხოვნებით დატბორილი ბევრი კომპანია რეაგირებას იწყებს და აგენტებს საკუთარ მომსახურებებზე წვდომას უზღუდავს.

მაგალითად, Amazon-მა Muse-ს კალათაში ნივთების დამატება შეუზღუდა. კომპანიის თქმით, ხელოვნური ინტელექტის ასისტენტებმა მისი გამოყენების პირობები დაარღვიეს.

ონლაინვაჭრობის გიგანტმა შეშფოთება გამოთქვა, თუ როგორ ამუშავებს Muse სენსიტიურ მონაცემებს. Amazon-ის თქმით, ასისტენტი საკუთარ ვინაობას არ ამჟღავნებს და ანგარიშების მონაცემებს ავტომატურად აგროვებს.