აშშ-ის 10-წლიანი ობლიგაციის შემოსავლიანობა 2002 წლის შემდეგ უმაღლესია

LSEG-ის მონაცემებით, 10-წლიანი სახაზინო ობლიგაციის შემოსავლიანობა ოთხი საბაზისო პუნქტით, 5,3338%-მდე გაიზარდა. მაჩვენებელმა ბოლოს 2002 წლის აპრილში დაფიქსირებულ დონეს გადააჭარბა. ის იპოთეკური სესხების, ავტოსესხებისა და საკრედიტო ბარათების დავალიანების განაკვეთებისთვის მნიშვნელოვანია.

30-წლიანი სახაზინო ობლიგაციის შემოსავლიანობა სამი საბაზისო პუნქტით, 5,6702%-მდე გაიზარდა. ეს 2002 წლის ივლისის შემდეგ უმაღლესი მაჩვენებელია. 2-წლიანი ობლიგაციის შემოსავლიანობა ორი საბაზისო პუნქტით, 4,91%-მდე გაიზარდა.

ობლიგაციების შემოსავლიანობა და ფასები საპირისპირო მიმართულებით მოძრაობს. ერთი საბაზისო პუნქტი 0,01%-ს უდრის.

ხუთშაბათს სახელმწიფო სესხების ღირებულებაზე ზეწოლა მთელ მსოფლიოში გაიზარდა.

ევროზონის საორიენტაციო მაჩვენებელი, გერმანიის 10-წლიანი ობლიგაციის შემოსავლიანობა, ოთხი საბაზისო პუნქტით, 3,6179%-მდე გაიზარდა. ეს 2008 წლის შემდეგ უმაღლესი დონეა. საფრანგეთის 10-წლიანი ობლიგაციის შემოსავლიანობა 11 საბაზისო პუნქტით, 4,9501%-მდე გაიზარდა. იტალიის ანალოგიური მაჩვენებელი 10 საბაზისო პუნქტით, 4,7171%-მდე ავიდა, ხოლო გაერთიანებული სამეფოსი ხუთი საბაზისო პუნქტით, 5,483%-მდე გაიზარდა.

ბოლო თვეებში წამყვანი ეკონომიკებისთვის სესხების ღირებულება მკვეთრად გაიზარდა. ინვესტორებს უფრო მაღალი საპროცენტო განაკვეთები, სახელმწიფო ვალის მოცულობა და საბიუჯეტო ხარჯების გეგმები აშფოთებთ.