აშშ-ის გეგმა უკრაინას ნატოზე უარის სანაცვლოდ ევროკავშირში გაწევრებას სთავაზობს

„The Economist“-ის ცნობით, უკრაინაში ომის დასრულების შესახებ აშშ-ის გეგმა უკრაინას ნატოში გაწევრებაზე უარის სანაცვლოდ საინვესტიციო პროგრამასა და ევროკავშირში გაწევრებას სთავაზობს. რუსეთისთვის კი გეგმა სანქციების შემსუბუქებასა და დასავლეთთან ეკონომიკური და პოლიტიკური კავშირების ნაწილობრივ აღდგენას ითვალისწინებს.

გამოცემის ცნობით, გეგმა ასევე ითვალისწინებს უკრაინის დონეცკის ოლქის იმ ნაწილში დემილიტარიზებული ზონის შექმნას, რომელიც რუსეთის ძალებს არ დაუკავებიათ.

გეგმა შესაძლოა ევროკავშირისთვის რუსული გაზის მიწოდების განახლებასაც ითვალისწინებდეს. „ნიუ-იორკ ტაიმსის“ წყაროებმა მანამდე განაცხადეს, რომ ევროკავშირმა ეს წინადადება უკვე უარყო.

„The Economist“-ის ცნობით, უკრაინის ოფიციალურმა პირებმა სამშვიდობო გეგმის მხოლოდ „ზოგადი მონახაზი“ იციან. რუსეთისა და უკრაინის ომის დასრულების შესახებ აშშ-ის ახალი წინადადების დეტალები უცნობია.

აშშ კვლავ ცდილობს რუსეთისა და უკრაინის სამშვიდობო მოლაპარაკებების განახლებას. პრეზიდენტ დონალდ ტრამპის სპეციალური წარმომადგენელი სტივ უიტკოფი 21 ოქტომბერს, მრავალი თვის შემდეგ პირველად, მოსკოვში ჩავიდა და ვლადიმერ პუტინს შეხვდა. მანამდე უიტკოფი ოსლოში იმყოფებოდა, სადაც ვოლოდიმირ ზელენსკის შეხვდა. გავრცელებული ცნობით, უიტკოფმა მოსკოვში გამართულ მოლაპარაკებებზე ახალი სამშვიდობო გეგმა ჩაიტანა, თუმცა მისი დეტალები უცნობი იყო.