აშშ-ს ევროპა სჭირდება, რადგან პუტინი არაფერს სთავაზობს

ევროპელი დიპლომატების ცნობით, უიტკოფი და კუშნერიც თანდათან ხვდებიან, რომ პუტინი მათ თითქმის არაფერს სთავაზობს. ორივე მხარის პოზიციები კვლავ ძალიან დაშორებულია.

ახლა ევროპელებს ეშინიათ, რომ ჩიხში შესული მოლაპარაკებების წინ წასაწევად ვაშინგტონი მათ დათმობებს მოსთხოვს. ეს შეიძლება, განსაკუთრებით, რუსეთის წინააღმდეგ დაწესებული ევროპული სანქციების შემსუბუქებას გულისხმობდეს. ასეთ შემთხვევაში ევროპელები რუსულ დელეგაციას ამერიკელებთან ერთად კი არ დაუპირისპირდებიან, არამედ ორივე მხარის ზეწოლის ქვეშ აღმოჩნდებიან.

ამის თავიდან ასაცილებლად გერმანიის კანცლერი ფრიდრიხ მერცი, საფრანგეთის პრეზიდენტი ემანუელ მაკრონი და გაერთიანებული სამეფოს პრემიერ-მინისტრი ენდი ბერნემი მკაფიო მიზნებისა და გრაფიკის მქონე, სტრუქტურირებულ მოლაპარაკებებს მოითხოვენ. ევროპელ დიპლომატიურ წრეებში აცხადებენ, რომ სამიტის გამართვა, რომელზეც სახელმწიფოთა და მთავრობების მეთაურები ბოლო სადავო საკითხებს მოაგვარებენ, ჯერ ნაადრევია.

სწორედ ამიტომ არის გადამწყვეტი, ვინ წარმოადგენს ევროპას მოლაპარაკებებში, აღნიშნა ევროპული საბჭოს პრეზიდენტმა ანტონიო კოშტამ. იტალიის პრემიერ-მინისტრმა ჯორჯა მელონიმ დავა გააჩაღა იმაზე, ნამდვილად წარმოადგენენ თუ არა ე.წ. E3-ის წევრები, მერცი, მაკრონი და ბერნემი, მთელ ევროპას. მელონიმ წერილში გააკრიტიკა მანამდე არსებული მოლაპარაკებების ფორმატები და ევროპელი სპეციალური წარმომადგენლის დანიშვნა მოითხოვა.

დუბლინში ევროპული პოლიტიკური გაერთიანების სამიტის პარალელურად, რამდენიმე მთავრობის მეთაური მხარს უჭერდა ამ დავალების კოსტასთვის ან ევროკავშირის საგარეო პოლიტიკის ხელმძღვანელ კაია კალასისთვის გადაცემას. ორივეს მანდატი 2029 წლამდე აქვს და მათ შეუძლიათ, წევრ ქვეყნებში მთავრობის შესაძლო ცვლილებებს გაუძლონ.

გერმანია კი საფრანგეთთან და გაერთიანებულ სამეფოსთან ე.წ. E3 ფორმატის შენარჩუნებას ემხრობა. ამ ფორმატში ევროპული ინსტიტუტებისა და ნატოს წარმომადგენლებიც უნდა ჩაერთონ. დიპლომატები ამტკიცებენ, რომ მსგავსი მოდელი ირანის ბირთვულ შეთანხმებაზე მოლაპარაკებების დროსაც წარმატებით გამოიყენეს.

მათი თქმით, ეს ფორმატი ევროპაში ძალთა განაწილებას ასახავს და ამავე დროს საკმარისად მცირეა, რათა მოქმედება შეძლოს. უპირველესად კი, ის დაუყოვნებლივ მზად იქნება. მელონის მიერ მოთხოვნილი ახალი სპეციალური წარმომადგენლის არჩევას კი ძალიან დიდი დრო დასჭირდება.

მელონის ინიციატივის შემდეგ კოსტამ ევროპის წარმომადგენლობის საკითხი პარასკევს დუბლინში გასამართი ევროკავშირის არაფორმალური სამიტის დღის წესრიგში შეიტანა. თუმცა ბევრი მთავრობის მეთაური აცნობიერებს, რომ უთანხმოება მოსკოვს ხელს აძლევს. პუტინი ხშირად ამტკიცებს, რომ ევროპელებმა არც კი იციან, ვინ უნდა ილაპარაკოს მათ სახელით. ბოლოს ამაზე კუშნერმაც იხუმრა.

ამასობაში, შესაძლოა, უკვე მომდევნო კვირას ტრამპი და პუტინი ჩინეთის შენჟენში, აზია-წყნარი ოკეანის ეკონომიკური თანამშრომლობის სამიტის პარალელურად შეხვდნენ. შეხვედრაში შესაძლოა, ჩინეთის პრეზიდენტი სი ძინპინიც მონაწილეობდეს. ევროპელი დიპლომატები ვარაუდობენ, რომ იქ მომდევნო ნაბიჯებს განსაზღვრავენ. ტრამპზე დროის წნეხი იზრდება: 2027 წლის იანვრიდან მას ოპოზიციის მიერ სრულად კონტროლირებადი კონგრესის წინაშე მოუწევს მუშაობა.

თემებიანტონიო კოშტადონალდ ტრამპიემანუელ მაკრონიენდი ბერნემივლადიმერ პუტინიზელენსკისტივ უიტკოფიფრიდრიხ მერციჯარედ კუშნერიჯორჯა მელონი

გამოქვეყნდა 13 ნოემბერი, 2026

Microsoft-ის შეფერხებამ Outlook-ისა და Teams-ის მუშაობა შეაფერხა