ბრაზილიის სასამართლომ Meta-ს მედიის მასალების ხელოვნური ინტელექტის გასაწვრთნელად გამოყენება აუკრძალა

სან-პაულუს სასამართლომ აშშ-ის კომპანია Meta-ს აუკრძალა იმ მედია კომპანიების მასალების ხელოვნური ინტელექტის გასაწვრთნელად გამოყენება, რომლებიც ბრაზილიის სამ პრესასოციაციაში არიან გაერთიანებული. ბრაზილიურმა მედიასაშუალებებმა საინფორმაციო სააგენტო AFP-ის შესაბამისი ცნობა გაავრცელეს.

სან-პაულუს 44-ე სამოქალაქო სასამართლოს მოსამართლე გილერმე მადეირა დეზემ დროებითი განკარგულება ეროვნული გაზეთების ასოციაციის (ANJ), ბრაზილიის რადიო- და ტელემაუწყებელთა ასოციაციის (Abert) და ჟურნალების გამომცემელთა ეროვნული ასოციაციის (Aner) სარჩელის საფუძველზე გამოსცა. ასოციაციები აცხადებდნენ, რომ Meta-მ თავისი პლატფორმების შემდგომი გამოყენების პირობად მასალების უსასყიდლოდ გადაცემა დააწესა. ეს Meta-ს ბიზნესმომხმარებლებისთვის განკუთვნილ ახალ პირობებში წერია, რომლებიც 20 ნოემბერს უნდა ამოქმედებულიყო.

სასამართლოს განჩინებაში ნათქვამია: „მედიაკომპანიებისთვის საავტორო უფლებებით დაცული მასალის უსასყიდლოდ და შეუზღუდავად გადაცემის დავალდებულება, ფაქტობრივად, ერთგვარი „გადასახადის“ სახით, რათა მათ კვლავ შეძლონ ყოფნა იმ არხებზე, რომლებითაც დღევანდელი აუდიტორია ახალ ამბებს იღებს, აშკარა სამართლებრივი უფლებამოსილების ბოროტად გამოყენებაა“.

მოსამართლემ Meta-ს ახალი პირობების ეს ნაწილი შეაჩერა და სოციალურ მედიაკომპანიას აუკრძალა იმ მედიის დასჯა, რომელიც ამ პირობებს არ დაეთანხმება. განკარგულების დარღვევის შემთხვევაში სასამართლომ აშშ-ის კომპანიას ყოველდღიურად ერთი მილიონი რეალის (162 000 ევროს) ოდენობის ჯარიმა დაუწესა.

ეროვნული გაზეთების ასოციაცია ANJ-ის განცხადებით, „ეს გადაწყვეტილება სამი ასოციაციის პირველი წარმატებაა ინტელექტუალური საკუთრებისა და პროფესიული ჟურნალისტიკის მდგრადობის დაცვის საქმეში. ორივე აუცილებელია, რათა საზოგადოებას ხარისხიან ინფორმაციაზე წვდომა ჰქონდეს“.

ბოლო პერიოდში Meta ბრაზილიის სასამართლო ხელისუფლებასთან არაერთხელ დაპირისპირებულა. 25 ოქტომბერს დაგეგმილ საპრეზიდენტო არჩევნების მეორე ტურზე უზენაესმა საარჩევნო სასამართლომ დაადგინა, რომ ორივე კანდიდატზე, პრეზიდენტ ლუის ინასიუ ლულა და სილვაზე და მის მეტოქე ფლავიუ ბოლსონარუზე, ერთი და იგივე წესები უნდა გავრცელებულიყო.

მანამდე ლულას საარჩევნო შტაბმა Facebook-ის მფლობელ კომპანიას არჩევნებზე გავლენის მოხდენაში დასდო ბრალი. შტაბის თქმით, Meta-მ პრეზიდენტის პოსტების გავრცელების მასშტაბი შეზღუდა და ბოლსონარუს მასალები უფრო ხილული გახადა. Meta-მ ბრალდებები უარყო, თუმცა ტექნიკური „ინციდენტები“ აღიარა.

გასული წლის დასაწყისში ბრაზილიის მთავრობამ Meta-ს 72-საათიანი ვადა მისცა. აშშ-ის კომპანიას უნდა აეხსნა, როგორ შეესაბამებოდა მის პლატფორმებზე კონტენტის მოდერაციის შეწყვეტა ბრაზილიის კანონებს.