ბულგარეთი Starlink-ის საბოტაჟში ეჭვმიტანილებს გერმანიაში ეძებს

სოფიის სასამართლომ პროკურორების მოთხოვნა დააკმაყოფილა და დაადგინა: „შეგროვებული მტკიცებულებები იძლევა დასკვნის საშუალებას, რომ ორი ბრალდებულის მონაწილეობაზე გონივრული ეჭვის საფუძველი არსებობს“.

რუსეთის შეჭრის პირობებში უკრაინის სამხედრო ძალები ბრძოლის ველზე კავშირისთვის Starlink-ის სამხედრო დანიშნულების თანამგზავრული ინტერნეტის მომსახურებას, Starshield-ს, იყენებენ.

ბულგარეთს უკრაინასთან უშუალო საზღვარი არ აქვს, თუმცა ის შავი ზღვის სანაპიროზე მდებარეობს. შავი ზღვა კონფლიქტის ერთ-ერთი დაძაბული კერაა. მსგავსი შემთხვევის გამო გასულ კვირას ოთხი ადამიანი დააკავეს გერმანიაშიც. საქმე პოლონეთს ეხებოდა, რომელსაც უკრაინასთან უშუალო საზღვარი აქვს.

ორ არასრულწლოვან ეჭვმიტანილს ბრალად 9 ოქტომბრის საღამოს ანტენებისთვის განზრახ ცეცხლის წაკიდება ედება.

პროკურორების ცნობით, სოფიის სამხრეთით მდებარე მთიან რეგიონში განთავსებული 18 ანტენიდან სამი მთლიანად განადგურდა. ორი ნაწილობრივ დაიწვა, კიდევ სამი კი დაზიანდა.

პროკურორების თქმით, ეჭვმიტანილები სერბეთიდან გერმანული სანომრე ნიშნების მქონე ავტომობილით შევიდნენ. ისინი თავს ტურისტებად ასაღებდნენ და სავარაუდო დანაშაულის პერიოდში ადგილზე მხოლოდ რამდენიმე საათით დარჩნენ.

ბულგარეთის შიდა დაზვერვის სააგენტოს, DANS-ის ხელმძღვანელმა პლამენ ტონჩევმა განაცხადა, რომ გამოძიება განზრახ საბოტაჟის ვერსიით მიმდინარეობს. მისი თქმით, მომავალში სხვა მსგავსი ქმედებების გამორიცხვა შეუძლებელია.

ამ ცნობამდე ერთი კვირით ადრე გერმანიაში ოთხი ადამიანი დააკავეს. მათ სექტემბრის ბოლოს ცენტრალურ პოლონეთში Starlink-ის თანამგზავრული კავშირის სადგურის საბოტაჟში ადანაშაულებენ.

გასული კვირის დასაწყისში გერმანიის პოლიციამ ქვეყანაში მცხოვრები სამი კაცი და ერთი ქალი დააკავა. მათგან ორი თურქეთის მოქალაქეა.

პოლონეთის ოფიციალური პირების თქმით, მათი ვარაუდით, საბოტაჟის მცდელობის უკან რუსეთი იდგა. პრემიერ-მინისტრმა დონალდ ტუსკიმ ამას „ჰიბრიდული ომის“ აქტი უწოდა.

პოლონეთის შიდა დაზვერვის სააგენტომ ასევე განაცხადა, რომ სავარაუდო ოპერაციისას რუსეთი გერმანიაში ორგანიზებულ დანაშაულებრივ ჯგუფებთან თანამშრომლობდა.

ამასობაში, ლიეტუვის პრემიერ-მინისტრმა კვირას განაცხადა, რომ რუსეთი, სავარაუდოდ, ბალტიისპირეთში ხანძრის გაჩენის მცდელობის უკან იდგა. თავდასხმის სამიზნე კომპანია Starlink-ის თანამგზავრების საკომუნიკაციო მოწყობილობებს მასპინძლობს.