ჩინეთი ჯენსენ ჰუანგის საქმეზე ჯაშუშობის ბრალდებას უარყოფს

Nvidia-ს ხელმძღვანელის, ჯენსენ ჰუანგის შესაძლო ჩინელ ჯაშუშთან ურთიერთობის საქმეზე ჩინეთის საგარეო საქმეთა სამინისტრომ ბრალდებები უარყო. პეკინში საგარეო საქმეთა სამინისტროს წარმომადგენელმა გუო ძიაკუნმა განაცხადა, რომ ჩინელი ჯაშუშის შესახებ საუბარი გამოგონილი და ცილისმწამებლურია.

აშშ-ის ჩიპების მწარმოებელი კომპანიის ხელმძღვანელმა, რომლის პროდუქციაც ხელოვნური ინტელექტის განვითარებისთვის მნიშვნელოვან ტექნოლოგიას უზრუნველყოფს, მანამდე განაცხადა, რომ ცოლს უღალატა. პარალელურად, Nvidia-მ გამოძიება დაიწყო. თუმცა, კომპანიის დირექტორთა საბჭომ აღნიშნა, რომ ამჟამად საფუძველი არ აქვს ივარაუდოს, რომ Nvidia-ს სავაჭრო საიდუმლოებები ან აშშ-ის ეროვნული უსაფრთხოება საფრთხის ქვეშ აღმოჩნდა.

რამდენიმე მედიასაშუალებამ, მათ შორის ფაინენშალ ტაიმსმა (Financial Times) და ნიუ-იორკ ტაიმსმა (New York Times), მანამდე გაავრცელა ინფორმაცია, რომ ჰუანგი შესაძლოა უცხო ქვეყნის ჯაშუშობის სამიზნე გამხდარიყო. მიზეზად მისი ურთიერთობა დაასახელეს ქალთან, რომელიც, აშშ-ის უსაფრთხოების სფეროს წარმომადგენლების ვარაუდით, ჩინეთის დაზვერვას გადაბირებული ჰყავდა.

ჩინეთის სახელმწიფო გაზეთმა „გლობალ ტაიმსმა“ (Global Times) აშშ-ის მედიასაშუალებები გააკრიტიკა. კომენტარში გამოცემამ დაწერა, რომ მათ ჯაშუშობის ამბავი რამდენიმე ფოტოს, ქალის „აზიური გარეგნობის“, Nvidia-ს მიერ ჩინეთის მიმართ სავაჭრო შეზღუდვების შემსუბუქების მცდელობის, საქმესთან დაკავშირებული წყაროების ნათქვამისა და მედიის ვარაუდების საფუძველზე გააზვიადეს. სინგაპურის შინაგან საქმეთა სამინისტრომაც უარყო აშშ-ის მედიის ცნობები, თითქოს სინგაპურის ხელისუფლება ქალის ჩინეთთან კავშირებს იძიებდა.