NASA მთვარეზე საცხოვრებლად და სამუშაოდ ასტრონავტებს ეძებს

თუ მთვარეზე წასვლაზე ოცნებობთ, ახლა ამის შანსი გაქვთ. NASA განაცხადებს იღებს მათგან, ვისაც ასტრონავტობა სურს.

NASA-ს ადმინისტრატორმა ჯარედ აიზეკმანმა შაბათს გავრცელებულ განცხადებაში აღნიშნა, რომ ასტრონავტებად შერჩეული კანდიდატები კოსმოსურ ხომალდებს გამოცდიან და მომავალ მთვარის ბაზაზე იცხოვრებენ და იმუშავებენ.

განცხადებაში ნათქვამია: „ეს მისიები ტექნიკურ სრულყოფილებას, სწორ განსჯას, გუნდურ მუშაობასა და გამბედაობას მოითხოვს. NASA-ს ასტრონავტთა კორპუსი ყოველთვის იწვევდა გამორჩეულ ამერიკელებს, რომლებიც მზად იყვნენ, ქვეყნის სამსახურში განსაკუთრებული სირთულეები დაეძლიათ“.

ამჟამად NASA-ს ასტრონავტთა კორპუსში 32 მოქმედი ასტრონავტია. NASA-ს მონაცემებით, 1960-იან წლებში მისიების დაწყებიდან სააგენტომ ასტრონავტებად მოსამზადებლად 370 ადამიანი შეარჩია.

კანდიდატების შერჩევა უკიდურესად კონკურენტულია. NASA-ს ასტრონავტთა ბოლო ჯგუფში 8 000-ზე მეტი მსურველიდან მხოლოდ 10 კანდიდატი შეარჩიეს.

განაცხადის შეტანა აშშ-ის ნებისმიერ მოქალაქეს შეუძლია და ასაკობრივი შეზღუდვა ოფიციალურად არ მოქმედებს. კანდიდატებს, თუმცა, მეცნიერების, ტექნოლოგიების, ინჟინერიისა და მათემატიკის მიმართულებით მაგისტრის ხარისხი უნდა ჰქონდეთ.

ცოტა ხნის წინ წესები შეიცვალა და მოთხოვნებს ახლა საექთნო საქმის დიპლომიც აკმაყოფილებს.

NASA-ს წარმომადგენელმა ანა შნაიდერმა კვირას ენ-პი-არს უთხრა: „საექთნო საქმის დიპლომები ახლა მეცნიერების, ტექნოლოგიების, ინჟინერიისა და მათემატიკის მიმართულებებში შედის. საექთნო საქმის მაგისტრის ხარისხი ახლა მინიმალურ საგანმანათლებლო მოთხოვნას აკმაყოფილებს, მაშინ როცა ადრე ამ მიმართულების დიპლომები არ მიიღებოდა“.

გარდა ამისა, NASA კანდიდატებისგან ხარისხის მიღების შემდეგ შესაბამის სფეროში სულ მცირე სამწლიან პროფესიულ გამოცდილებას მოითხოვს.

მაგისტრის ხარისხისა და სამუშაო გამოცდილების ნაცვლად, NASA განიხილავს მეცნიერების, ტექნოლოგიების, ინჟინერიისა და მათემატიკის მიმართულებით დოქტორანტურის სტუდენტებს, ექიმებს ან პილოტებს, რომლებსაც ფრენის დიდი გამოცდილება აქვთ.

შერჩევის შემთხვევაში, ასტრონავტები ორწლიან მომზადების კურსს გაივლიან. NASA-ს ცნობით, ისინი რთული და მნიშვნელოვანი მისიებისთვის მოემზადებიან, მათ შორის მთვარის სამხრეთ პოლუსთან დაშვებისთვის.

2028 წელს ადამიანების მთვარეზე დაბრუნების მიზნის მისაღწევად, რაც 1972 წლის შემდეგ პირველად მოხდება, NASA კერძო კომპანიებს, მათ შორის Blue Origin-სა და SpaceX-ს, სისტემებისა და კოსმოსური ხომალდების შექმნაში ეყრდნობა.