კიბერშეტევები სამაცივრო სისტემებზე: რატომ ჩაერთნენ სპეცსამსახურები

სუპერმარკეტების სამაცივრო სისტემებზე მასშტაბური კიბერშეტევების შემდეგ მიმდინარე გამოძიებაში პოლიციასთან ერთად გერმანიის სპეცსამსახურებიც ჩაერთნენ. გერმანიის კონსტიტუციის დაცვის ფედერალურმა სამსახურმა (BfV) ჰანდელსბლატის შეკითხვის პასუხად განაცხადა, რომ ინციდენტები „მიმდინარე სადაზვერვო გამოძიების საგანია“. თემას ასევე იკვლევს ჰიბრიდულ საფრთხეებთან ბრძოლის ახლახან შექმნილი ერთობლივი ცენტრი (GAZ Hybrid). ცენტრში პოლიცია და ისეთი სპეცსამსახურები თანამშრომლობენ, როგორებიცაა გერმანიის საგარეო დაზვერვის ფედერალური სამსახური (BND) და სამხედრო კონტრდაზვერვის სამსახური (MAD). მათი მიზანია ჯაშუშობის, დივერსიისა და სხვა ჰიბრიდული საფრთხეების აღკვეთა.

კიბერშეტევები, რომლის დროსაც უცნობმა პირებმა მიზანმიმართულად შეცვალეს სამაცივრო ვიტრინებისა და საყინულეების ტემპერატურის მარეგულირებლების პარამეტრები, ჩრდილოეთ რაინ-ვესტფალიის, ქვემო საქსონიისა და ბავარიის გარდა, ევროპის მრავალ სხვა ქვეყანასაც შეეხო. შესაბამისი თავდასხმები დაფიქსირდა ბელგიის, შვედეთის, ირლანდიის, ლუქსემბურგის, ესტონეთის, ფინეთისა და ნიდერლანდების სუპერმარკეტებშიც.

საფრანგეთში კრიმინალების სამიზნე საკვების მომარაგების სისტემასთან ერთად სისხლის ბანკების სამაცივრო სისტემებიც გახდა. ეს თავდასხმები დროულად აღმოაჩინეს. თავდამსხმელებმა ავტომატიზებული საძიებო პროგრამებით ინტერნეტში დაუცველი სისტემები იპოვეს. მათ წვდომა მოიპოვეს მოძველებული პროგრამული უზრუნველყოფის ცნობილი სისუსტეების ან შეუცვლელი ნაგულისხმევი პაროლების გამოყენებით. სულ მცირე ერთ შემთხვევაში თავდასხმა გარე ტექნიკური მომსახურების მიმწოდებლის მეშვეობით განხორციელდა.

შედეგები მძიმე იყო: კრიმინალებმა დანადგარები არა მხოლოდ გამორთეს, არამედ მიზანმიმართულად ჩართეს გალღობის ან გათბობის რეჟიმი. ამის შედეგად სამაცივრო ვიტრინებში ტემპერატურა ზოგჯერ 50 გრადუსამდე გაიზარდა. დიდი რაოდენობით საკვები გაფუჭდა და მისი გადაყრა გახდა საჭირო.

ჯერჯერობით უცნობია, იყო თუ არა თავდასხმები ევროპის საკვებით მომარაგების წინააღმდეგ მიმართული კოორდინირებული დივერსიული კამპანიის ნაწილი. ჰანდელსბლატის ცნობით, გერმანიის შინაგან საქმეთა სამინისტროს არ აქვს ინფორმაცია, რომელიც კონკრეტულ პირს ან სახელმწიფო უწყებასთან კავშირს ცალსახად დაადასტურებდა. ბერლინის განმარტებით, საბოლოო შეფასებისთვის დეტალური ანალიზია საჭირო.

მიუხედავად ამისა, საერთაშორისო უწყებები განგაშს ტეხენ. აშშ-ის უწყებები, მათ შორის გამოძიების ფედერალური ბიურო (FBI) და კიბერუსაფრთხოებისა და ინფრასტრუქტურის უსაფრთხოების სააგენტო (CISA), ინტერნეტთან დაკავშირებული ტემპერატურის მარეგულირებლების სისუსტეებზე აფრთხილებენ. გერმანიის ინფორმაციული უსაფრთხოების ფედერალურმა სამსახურმაც (BSI) განაახლა რეკომენდაციები. სამსახურმა ოპერატორებს მოუწოდა, ინტერნეტიდან პირდაპირი წვდომა შეზღუდონ და პროგრამული უზრუნველყოფის განახლებები დააინსტალირონ.