„ჩრდილოეთის ნაკადის“ საბოტაჟისთვის უკრაინელი სამხედრო გასამართლდება

უკრაინის პრეზიდენტმა ვოლოდიმირ ზელენსკიმ უარყო, რომ მისი ქვეყანა თავდასხმაში მონაწილეობდა.

კუზნეცოვი 2025 წლის აგვისტოში, იტალიაში ოჯახთან ერთად დასვენებისას დააკავეს. იტალიის პოლიციის ცნობით, ის წინააღმდეგობის გარეშე ჩაბარდა. კუზნეცოვი ყალბი პასპორტით მოგზაურობდა. ექსტრადიციის აღკვეთის სამართლებრივი მცდელობები წარუმატებლად დასრულდა და გასული წლის ნოემბერში ის გერმანიას გადასცეს.

კიდევ ერთი ეჭვმიტანილი, კონდიციონერების ხელოსანი და მოყვარული მყვინთავი ვოლოდიმირ ჟურავლიოვი, აგვისტოში ჩრდილოეთ ხორვატიაში ევროპული ორდერით დააკავეს. მან ხორვატიაში თავშესაფარი მოითხოვა და გერმანიაში ექსტრადიციას ეწინააღმდეგება. ჟურავლიოვი საბოტაჟში მონაწილეობას უარყოფს.

სასამართლო პროცესი შესაძლოა უკიდურესად მწვავე აღმოჩნდეს, რადგან უკრაინა ფაქტობრივად თავისი მოკავშირისა და ომის დროს ერთ-ერთი ყველაზე მტკიცე მხარდამჭერის წინააღმდეგ ჩადენილი დანაშაულისთვისაა განსასჯელი. ამის გათვალისწინებით, გერმანიის მთავრობამ პროცესზე კომენტარის გაკეთებაზე უარი თქვა.

გამოკითხვებში მზარდი მხარდაჭერის მქონე ულტრამემარჯვენე პოპულისტურმა და პროკრემლისტურმა პარტიამ „ალტერნატივა გერმანიისთვის“ (Alternative für Deutschland) „ჩრდილოეთის ნაკადის“ საქმით თავისი პოზიციის განმტკიცება სცადა. პარტია მოითხოვს, რომ გერმანიამ უკრაინის დახმარება შეწყვიტოს და გაზსადენი აღადგინოს. მისი მტკიცებით, იაფი გაზის მიწოდება ცხოვრების გაძვირების კრიზისთან გამკლავებას შეუწყობს ხელს.

პროცესი დიდ ყურადღებას იქცევს. თავდასხმამდეც „ჩრდილოეთის ნაკადი“ უკიდურესად სადავო საკითხი იყო. რუსეთის ლიდერმა ვლადიმერ პუტინმა და გერმანიის მაშინდელმა კანცლერმა გერჰარდ შრიოდერმა „ჩრდილოეთის ნაკადი 1-ის“ მეშვეობით უკრაინისთვის, როგორც სატრანზიტო ქვეყნისთვის, გვერდის ავლა შეძლეს. მას შემდეგ, რაც შრიოდერმა კანცლერის თანამდებობა დატოვა, პუტინმა ის კომპანია „ნორდ სტრიმ AG-ის“ (Nord Stream AG) სამეთვალყურეო საბჭოს თავმჯდომარედ დანიშნა. გასულ კვირას შრიოდერი პუტინის დაბადების დღის აღნიშვნას დაესწრო.

ჰამბურგის პროცესში თანამოსარჩელეებად ჩართვის შესახებ რუსეთის წარმომადგენლების მოთხოვნა სასამართლომ უარყო. „ჩრდილოეთის ნაკადი 2-ის“ მფლობელი გაზპრომი ამ უფლებას თავდასხმის მძიმე ეკონომიკური შედეგებით ასაბუთებდა. სასამართლომ აღნიშნა, რომ გაზსადენების შეკეთება ძვირი დაჯდებოდა, თუმცა მათი აღდგენა ეკონომიკურად შეუძლებელი არ იქნებოდა.

გავრცელებული ცნობებით, სასამართლო პროცესზე კუზნეცოვი დუმილის უფლებას გამოიყენებს. მისი სამხედრო მოწმობა მიუთითებს, რომ გაზსადენების აფეთქების დროს ის მოქმედ სამხედრო სამსახურში იმყოფებოდა.

სავარაუდოდ, მისი ადვოკატები ორი სამხედრო უფროსის წერილობით ჩვენებებს წარადგენენ. ამით ისინი დაასაბუთებენ, რომ კუზნეცოვს, როგორც სამხედროს, საკუთარი მოქმედებების დეტალების გამჟღავნება ეკრძალება.

გავრცელებული ცნობებით, კუზნეცოვი ბრძანებებს თავდასხმის სავარაუდო ორგანიზატორისგან იღებდა. ეს პირი ერთ-ერთია მათ შორის, ვინც კუზნეცოვის სასარგებლოდ წერილობითი ჩვენება ფიცის ქვეშ მისცა.

ჰამბურგის ჰანზის უმაღლეს სამხარეო სასამართლოში 17 დეკემბრის ჩათვლით 16 სხდომაა დანიშნული. დამატებითი სხდომები, სავარაუდოდ, იანვარსა და თებერვალში გაიმართება.

თემებიგერჰარდ შრიოდერივლადიმერ პუტინივოლოდიმირ ზელენსკივოლოდიმირ ჟურავლიოვისერჰი კუზნეცოვიალტერნატივა გერმანიისთვისგაზპრომინორდ სტრიმ AGჰამბურგიჩრდილოეთის ნაკადი

გამოქვეყნდა 14 ოქტომბერი, 2026