დაუნინგ-სტრიტი ჩინურ ელექტრომობილებზე ტარიფებს არ გამორიცხავს

მერსედეს-ბენცის (Mercedes-Benz) ხელმძღვანელმა ოლა კალენიუსმა გააფრთხილა, რომ გაერთიანებული სამეფოს კანონმდებლობის მიღმა დატოვება ევროკავშირის ლიდერთა „განზრახ არჩევანი“ იქნება. მისი თქმით, ამით ისინი მთელ ბლოკში საავტომობილო სექტორს „დააზიანებენ“. კალენიუსი ევროპის ავტომობილების სავაჭრო გაერთიანება ACEA-ს პრეზიდენტიცაა.

ახალი ფრანგულ-გერმანული წინადადება იმ ევროპელი პარტნიორების დამატებით ჩართვას ითვალისწინებს, რომლებიც 2020 წლის 1 იანვარს ევროკავშირის ერთიან ბაზარში მონაწილეობდნენ. მათ შორის გაერთიანებული სამეფო და ნორვეგია არიან. სანაცვლოდ, ქვეყნებმა ინვესტიციებთან დაკავშირებული პირობები და სავაჭრო დაცვის შესაბამისი ზომები დინამიკურად უნდა შეათანხმონ.

საბაჟო ტარიფებმა შესაძლოა გაერთიანებულ სამეფოში მწარმოებლებს იაფფასიანი ჩინური მოდელებისგან ბაზარი დაუცვას. თუმცა, მათ მომხმარებლებისთვის ფასების გაზრდა და ჩინეთში გაყიდვებით დაინტერესებული ბრიტანელი მწარმოებლების დაზარალებაც შეუძლიათ. გაერთიანებულ სამეფოში წარმოებული ავტომობილების დაახლოებით 80% ექსპორტზე გადის. ნახევარზე მეტი ევროკავშირში, ხოლო 6% ჩინეთში იგზავნება.

ვაჭრობის მინისტრმა ანას სარვარმა პოლიტიკოს (Politico) უთხრა, რომ ჩინეთის დომინირების დასაძლევად გაერთიანებულმა სამეფომ და ევროკავშირმა „ერთად და შეთანხმებულად უნდა იმოქმედონ“.

საავტომობილო სექტორის წყაროს თქმით, ევროკავშირმა აჩვენა, რომ ჩინეთთან დიალოგი და საპასუხო ზომების გარეშე გარკვეული დაცვის დაწესება შესაძლებელია.

ჩინეთი ელექტრომობილებზე საბაჟო ტარიფების გაფართოებას ეწინააღმდეგება. ევროკომისიის წარმომადგენლების თქმით, ბოლო თვეებში პეკინი ჩინურ ჰიბრიდულ ავტომობილებზე კვოტების დაწესების უახლეს გეგმას „შემზარავი მუქარით“ გამოეხმაურა და სავაჭრო ომით დაიმუქრა.

მსოფლიო სავაჭრო ორგანიზაციის წესებით, კვოტების შემოღება რამდენიმე თვეშია შესაძლებელი. საბაჟო ტარიფების დაწესებას კი შესაძლოა წელიწადზე მეტი დასჭირდეს. პროცესი გამოძიების შესახებ შეტყობინებით დაიწყება, შემდეგ კი ბრიტანეთის საავტომობილო სექტორისთვის სავარაუდო ზიანის მტკიცებულებებს შეაგროვებენ და გააზიარებენ.

საპარლამენტო ბიზნესკომიტეტის ლეიბორისტმა თავმჯდომარემ ლიამ ბერნმა განაცხადა, რომ ჩინურ ელექტრომობილებზე საბაჟო ტარიფები ორივე მხარეს სექტორის გადასარჩენად „მცირე საფასურია“. ლონდონში გამართულ კონფერენციაზე მან თქვა: „გაერთიანებულ სამეფოს სასწრაფოდ სჭირდება ჩინეთის მიმართ ახალი სტრატეგია, რათა ბრიტანული და ევროპული წარმოება არ მოკვდეს“.

ბერნი მთავრობის მიდგომას გულუბრყვილოს უწოდებს. მისი აზრით, ის ჩინეთის საექსპორტო პოლიტიკის შეცვლის ცრუ იმედს ეფუძნება. მან განაცხადა: „ჩვენი სტრატეგია ჩინეთის მიმართ საჭირო დონეზე არ დგას. გაერთიანებულ სამეფოს სასწრაფოდ სჭირდება თანმიმდევრული სტრატეგია, რომელიც დღეს არ აქვს“.

თემებიანას სარვარილიამ ბერნიოლა კალენიუსიჯონათან რეინოლდსიდაუნინგ-სტრიტიევროკავშირიევროკომისიამერსედეს-ბენციგაერთიანებული სამეფოჩინეთი

გამოქვეყნდა 18 ოქტომბერი, 2026