ექსპერტები: ებოლის კენიაში გავრცელება ვირუსთან ბრძოლას საფრთხეს უქმნის

40 წლის კენიელი კაცი, რომელიც კონგოს დემოკრატიულ რესპუბლიკაში ცხოვრობდა და ერთი თვის განმავლობაში თავს შეუძლოდ გრძნობდა, სახმელეთო გზით უგანდის დედაქალაქ კამპალაში ჩავიდა. შემდეგ ის კენიის დედაქალაქ ნაირობიში გაფრინდა, სადაც ებოლა დაუდგინეს. კაცი 5 ოქტომბერს გარდაიცვალა.

კენიის ჯანდაცვის სამინისტროს ცნობით, ქვეყანამ ამ კვირაში ებოლის მეორე შემთხვევა დაადასტურა. ინფიცირებული 39 წლის კაცია, რომელიც პირველი პაციენტის ახლო ნათესავია. ის უკვე კარანტინში იმყოფებოდა, როცა სამშაბათს ავად გახდა.

ეს კიდევ ერთი ნიშანია, რომ კონგოს დემოკრატიული რესპუბლიკის ისტორიაში ებოლის ყველაზე მომაკვდინებელი აფეთქება ჯერ კიდევ შორსაა შეკავებისგან.

ექსპერტებმა The Independent-ს განუცხადეს, რომ შემთხვევების დაახლოებით მესამედს პაციენტის სიკვდილის შემდეგ ავლენენ. დადასტურებული შემთხვევების დაახლოებით ნახევარს კი ცნობილი ეპიდემიოლოგიური კავშირი არ აქვს. შესაბამისად, უცნობია, სად და ვისგან დაინფიცირდა ადამიანი.

კონგოს დემოკრატიულ რესპუბლიკაში ორგანიზაციის „ექიმები საზღვრებს გარეშე“ (Médecins Sans Frontières, MSF) საგანგებო პროგრამის მენეჯერის, ტრიშ ნიუპორტის თქმით, კონტაქტების მოძიების მაჩვენებელი 80%-ზე ნაკლებია და სამიზნე ნიშნულს ჩამორჩება. ერთ-ერთ უდიდეს პრობლემად თავად კონტაქტების გამოვლენა რჩება.

ნიუპორტმა თქვა: „ადამიანის გარდაცვალების შემდეგ ძნელია მისი გადაადგილების მარშრუტის დადგენა. ადამიანები გადაადგილდებიან ისე, რომ არ იციან, შესაძლოა, ებოლა ჰქონდეთ“.

ნიუპორტმა დასძინა: „კონტაქტების აღრიცხვის მთელი პროცესი გაუმჯობესებას საჭიროებს“. მისი თქმით, ინფიცირებული ადამიანების გადაადგილების მარშრუტების დადგენას ბევრი რესურსი სჭირდება და ამჟამად ეს არ კეთდება.

ებოლის აფეთქებაზე რეაგირებას საერთაშორისო დახმარების მასშტაბურმა შემცირებამ შეუშალა ხელი. ამის გამო მომზადებული თანამშრომლებისა და საოპერაციო მხარდაჭერის ხელმისაწვდომობა შემცირდა. აფეთქება ებოლის იშვიათმა ბუნდიბუგიოს შტამმა გამოიწვია, რომლის საწინააღმდეგო მკურნალობა ან წამალი არ არსებობს.

კონგოს დემოკრატიული რესპუბლიკისთვის აშშ-ის საგანგებო დახმარება 2024 წელს 805 მილიონი დოლარი იყო, 2025 წელს კი 373 მილიონ დოლარამდე შემცირდა. ჯანმომ ივნისში განაცხადა, რომ ებოლაზე რეაგირებისთვის საჭირო დაფინანსების ნახევარზე ნაკლები ჰქონდა.

გაეროს ბავშვთა სააგენტო იუნისეფმა ამ თვეში განაცხადა, რომ დაფინანსებაში 73,3 მილიონი დოლარი აკლდა. ეს ორგანიზაციის შეფასებით საჭირო თანხის დაახლოებით 65%-ია. აფეთქების შედეგად 1 900-ზე მეტი ბავშვი დაობლდა ან ოჯახს დაშორდა.