ელვის პრესლის სიმღერების უფლებამფლობელები Anthropic-ს უჩივიან

უფლებების მფლობელებს ნაკლები ჩატბოტური საუბარი და ბევრად მეტი ჰონორარი სურთ

ელვის პრესლის სიმღერების მფლობელთა და უფლებების მფლობელთა დიდმა ჯგუფმა Anthropic-ს საავტორო უფლებების დარღვევისთვის უჩივლა. მათი მტკიცებით, ხელოვნური ინტელექტის კომპანიამ „მეფის“ ნაწარმოებები თავისი მოდელების გასაწვრთნელად მოიპარა.

სარჩელში, რომელიც გასულ პარასკევს კალიფორნიის ჩრდილოეთ ოლქის აშშ-ის საოლქო სასამართლოში შეიტანეს, ნათქვამია: „ელვისის სახელით მოსარჩელეებმა ეს სარჩელი შეიტანეს, რათა მოპასუხის წინააღმდეგ თავიანთი ექსკლუზიური უფლებები დაიცვან. მოპასუხემ მთელი თავისი ბიზნესმოდელი საავტორო უფლებების ისეთი მასშტაბური დარღვევის საფუძველზე ააგო, როგორიც აქამდე არ გვინახავს“.

მოსარჩელეები ელვისის 274 სიმღერას ფლობენ. მათი სათაურები საჩივრების აღსაწერად ბევრ შესაფერის მეტაფორას იძლევა, თუმცა სარჩელში შექსპირის ნაწარმოებზე მინიშნებაა გამოყენებული.

სარჩელში ნათქვამია: „მოპასუხე Anthropic-მა, არსებითად, გამოსცადა გამონათქვამი იმის შესახებ, შეძლებდნენ თუ არა მაიმუნები და საბეჭდი მანქანები, საკმარისი დროის მიცემის შემთხვევაში, „ჰამლეტის“ შექმნას. თუმცა, იმის ნაცვლად, რომ მოეცადათ „უსასრულო“ დრო, რომელიც უსასრულო მაიმუნის თეორემის თანახმად, საბეჭდ მანქანებთან მსხდომ მაიმუნებს დასჭირდებოდათ, რათა შემთხვევით, თითო ასოს აკრეფით, ცნობილი კითხვა, „ყოფნა თუ არყოფნა?“, შეედგინათ, Anthropic-მა გამოსავალი იპოვა“.

სარჩელში ასევე წერია: „მაიმუნების ნულიდან გაწვრთნის ნაცვლად, Anthropic-მა მიბაძვა, ანუ საავტორო უფლებების დარღვევა, ბევრად უფრო იოლ გზად მიიჩნია“.

სარჩელში მოყვანილი არგუმენტები ნაცნობი იქნება მათთვის, ვინც თვალს ადევნებს მრავალ ბრალდებას, რომლის თანახმადაც ხელოვნური ინტელექტის კომპანიებმა მოდელების გასაწვრთნელად ხელმისაწვდომი ყველა მასალა ჩაიყლაპეს:

• სამართლიანი გამოყენების დოქტრინა ხელოვნური ინტელექტის მოდელების გასაწვრთნელად გამოყენებულ ყველა მასალაზე არ ვრცელდება;

• Anthropic-ს უნდა სცოდნოდა, რომ ზოგიერთი ტორენტი და მონაცემთა ნაკრები, რომლებიც მოდელების გასაწვრთნელად გამოიყენა, ლიცენზირებული იყო და, შესაბამისად, თავისუფლად ვერ გამოიყენებოდა, ან მოპარული იყო;

• კომპანიას უნდა სცოდნოდა, რომ ლიცენზია სჭირდებოდა, სანამ Claude-ის პროდუქტებს ისეთ რამეს გააკეთებინებდა, როგორიცაა ელვისის სიმღერის ტექსტის შექმნა მომხმარებლის მოთხოვნის შემდეგ;

• ჩატბოტები უფლებამფლობელებს ზარალს აყენებენ, როცა მომხმარებლები მათ საავტორო უფლებებით დაცული შემოქმედების ავტორის „სტილში“ ახალი მასალის შექმნას სთხოვენ.