ენერგიის გაძვირების გამო საფრანგეთმა 450 მილიონი ევროს დახმარება გამოყო

წყვილმა პარიზიდან ჩრდილოეთით, დაახლოებით 90 კილომეტრში (55 მილი), პატარა ქალაქ სენ-ჟიუსტ-ან-შოსეში მაღაზია მარტში გახსნა. მაშინ ღუმლისთვის საჭირო 2 000 ლიტრ (528 გალონი) გათბობის საწვავში 2 230 ევრო (2 540 დოლარი) გადაიხადეს. გასულ კვირას თითქმის იგივე თანხა მხოლოდ 1 200 ლიტრში (317 გალონი) დახარჯეს.

28 თებერვალს ირანის ომის დაწყების შემდეგ საწვავის მკვეთრად გაზრდილი ფასები წყვილსა და ევროპის სხვა მცირე ბიზნესებს მძიმე დარტყმას აყენებს.

კევინ ლუსმა თქვა: „თავდაპირველად ეს კარგი არჩევანი იყო, რადგან საწვავზე მომუშავე ღუმელი ელექტროღუმელზე ეკონომიურია. ასე იყო, სანამ საწვავის ფასი 50%-ით გაიზრდებოდა. ამიტომ ახლა ეს უკვე კარგი არჩევანი აღარ არის“.

ლუსები გამონაკლისი არ არიან. საცხობებისა და საკონდიტროების ეროვნული ფედერაციის მონაცემებით, საფრანგეთში 34 000-ზე მეტი მცხობელი წელიწადში დაახლოებით 6 მილიარდ ბაგეტს აცხობს. მათი დაახლოებით მეოთხედი ნავთობპროდუქტზე ან გაზზე მომუშავე ღუმელს იყენებს.

სანამ მომხმარებლები დილის ბაგეტების, კრუასანებისა და სხვა ცომეულის საყიდლად შედიოდნენ, ლუსმა ასოშიეიტედ პრესს (Associated Press) უთხრა: „ენერგიაზე მთელი ეს ზედმეტი დანახარჯი დაკარგული შემოსავალია. ეს ხელფასია, რომელსაც ჩვენ ვერ ვიღებთ, თანამშრომლებისთვის ხელფასის მატებაა, რომელსაც ვერ ვაძლევთ, და ინვესტიციებია, რომლებსაც ვერ ვახორციელებთ“.

ენერგეტიკული კრიზისი მთელ მსოფლიოს აზარალებს, თუმცა განსაკუთრებით მძიმედ ევროკავშირის ფართობით უდიდესი ქვეყნის სოფლებსა და დასახლებებს ურტყამს. სოფლებში დაახლოებით 21 მილიონი ადამიანი, საფრანგეთის მოსახლეობის დაახლოებით მესამედი, ცხოვრობს. შეზღუდული საზოგადოებრივი ტრანსპორტის გამო, ისინი გადაადგილებისთვის ხშირად ავტომობილებს იყენებენ. სოფლის ტერიტორიები საფრანგეთის ფართობის თითქმის 90%-ს შეადგენს.

ე.წ. ყვითელი ჟილეტების საპროტესტო მოძრაობამ პრეზიდენტ ემანუელ მაკრონის მთავრობა მისი პირველი ვადის დროს შეარყია. მოძრაობამ სოფლის ქალაქებსა და დასახლებებში ფართოდ მოიკიდა ფეხი, ხოლო მომიტინგეები წრიულ გზაჯვარედინებზე ბანაკებს აწყობდნენ.

ზოგჯერ ძალადობრივი დემონსტრაციები საფრანგეთში თვეების განმავლობაში გრძელდებოდა. უკმაყოფილების ერთ-ერთი მიზეზი მაშინაც საწვავის ფასი იყო. ეს მტკივნეული მოგონება ახლა მაკრონის მინისტრებზე ზეწოლას ახდენს, რადგან ისინი ხარჯების მკვეთრი ზრდით გამოწვეულ ახალ შფოთვასა და რისხვას უმკლავდებიან.

საფრანგეთის მთავრობამ ამ კვირაში დახმარების ახალი პაკეტი წარადგინა. მისი სავარაუდო ღირებულება 450 მილიონი ევროა (დაახლოებით 512 მილიონი დოლარი). პაკეტი საწვავის უკიდურესად მაღალი ფასებით დაზარალებულ ადამიანებსა და დარგებს დაეხმარება. ის სუბსიდიებს ითვალისწინებს მათთვის, ვინც სამუშაომდე სულ მცირე 15 კილომეტრს (9 მილი) გადის. ასევე, 5,8 მილიონი ოჯახი ზამთრის ენერგიის გადასახადებისთვის 48-დან 277 ევრომდე (54-დან 315 დოლარამდე) დახმარებას მიიღებს.