ჰოლანდის დუბლმა ნორვეგიას დანიასთან გამარჯვება მოუტანა

ნორვეგიამ და დანიამ ერთა ლიგის ახალი გათამაშება დაიწყეს. ორივე ნაკრები მიზნად წარმატებულ სტარტს ისახავდა ჯგუფში, სადაც მათ პორტუგალია და უელსიც ელოდებათ. სკანდინავიურ დაპირისპირებაში ორივე გუნდი თავიდანვე გამარჯვებას ეძებდა და გოლებიც მალე გავიდა. საბოლოოდ, ჰოლანდმა დუბლით ნორვეგიელებს სამი ქულა მოუტანა. სიტის თავდამსხმელს ნაკრებში 56 მატჩში 64 გოლი დაუგროვდა. შთამბეჭდავი მაჩვენებელია.

სოლბაკენის გუნდმა ინიციატივა დასაწყისშივე მოიპოვა და ბურთს ფლობდა, დანია კი დაცვაში დახვდა. დანიელები თანდათან გააქტიურდნენ. პირველი სახიფათო მომენტი დორგუს ჰქონდა, რომლის დარტყმის მოგერიებაც ნიულანს მოუწია. შემდეგ კრისტენსენმა შორიდან სცადა გატანა. მასპინძლები მარჯვენა ფლანგზე ბობისა და რაიერსონის მონაწილეობით ქმნიდნენ საფრთხეს. მე-14 წუთზე ბობმა ანგარიში გახსნა. ოთხი წუთის შემდეგ, ნუსას გადაცემით ჰოლანდმა სხვაობა გაზარდა და დანიის დაბნეულობის მონაკვეთი დაასრულა.

რიმერის გუნდი მეორე გოლის შემდეგ გამოცოცხლდა და წინ წავიდა. ჯილდო 25-ე წუთზე მიიღო, როცა დამსგორმა საჯარიმო დარტყმით შესანიშნავი გოლი გაიტანა და სხვაობა შეამცირა. გოლმა ინგლისის წინააღმდეგ ევრო 2020-ზე მისივე დარტყმა გაახსენა. ამის შემდეგ თამაშის ტემპი შენელდა. ნორვეგიამ 38-ე წუთზე კვლავ შეუტია, თუმცა იორგენსენმა ბერგის თავური შესანიშნავად მოიგერია. ცოტა ხანში ნიულანდმა ჰოილუნდის დარტყმა მოიგერია, თუმცა ეპიზოდი თამაშგარე მდგომარეობის გამო გაუქმდა.

მეორე ტაიმის დასაწყისში ნორვეგია დომინირებდა, ჰოლანდმა კი მეორე გოლის გატანა სცადა. თუმცა დანია თანდათან გაძლიერდა. დანიელები ნიულანდის საჯარიმოს უახლოვდებოდნენ, თუმცა დიდ საფრთხეს ვერ ქმნიდნენ. კრისტენსენის დარტყმები სუსტი იყო. მე-60 წუთზე ნიულანდმა ჰიულმანდის პირველი დარტყმა მოიგერია, მაგრამ დამატებაზე ჰოილუნდმა ანგარიში გაათანაბრა. გოლმა დანია გაამხნევა და სტუმრები უპირატესობას დაეუფლნენ. 69-ე წუთზე ჰოილუნდმა ბურთი ძელს გაარტყა. ნორვეგია სულ უფრო მეტად მოექცა ზეწოლის ქვეშ და სტუმართა იერიშებს გაჭირვებით უმკლავდებოდა.

ყველაზე რთულ მომენტში ნორვეგიას „ვიკინგთა მეფე“ კვლავ მოევლინა. ჰოლანდმა ოდეგორის გადაცემით მესამე გოლი გაიტანა, დუბლი შეასრულა და მასპინძლებს უპირატესობა დაუბრუნა. გოლის შემდეგ ნორვეგია მატჩის ბედის გადაწყვეტას ცდილობდა. ნუსა და შელდერუპი მეოთხე გოლთან ახლოს იყვნენ, მაგრამ მომენტები ვერ გამოიყენეს. დანია ბოლომდე ცდილობდა, თუმცა ანგარიში აღარ შეცვლილა. ნორვეგიამ პირველ მატჩში სამი ქულა მოიპოვა.