ინგლისის მესამე ლიგის კლუბები ხარჯებზე დამატებითი შეზღუდვების დაწესებას ცდილობენ

მესამე დივიზიონში ხელფასებზე გაწეული ხარჯები ამ სეზონში 15%-ით გაიზარდა.

განიხილება „ფუფუნების გადასახადი“ და ზარალის სამწლიანი ლიმიტი.

ინგლისის მესამე ლიგის კლუბებს ახალი ხარჯვითი შეზღუდვების დაწესება სურთ, რათა მფლობელების ინვესტიციები შეიზღუდოს და ზარალი შემცირდეს.

კლუბებმა გასულ ზაფხულს წესების გამკაცრებას დაუჭირეს მხარი და ხარჯვის ზღვარი ბრუნვის 60%-დან 50%-მდე შეამცირეს. მათ ასევე გააუქმეს მფლობელების ინვესტიციების ეტაპობრივი გათვალისწინება. შედეგად, კაპიტალის სახით შეტანილი თანხის მხოლოდ 50%-ის გამოყენება შეიძლება გუნდის ხარჯებისთვის, დანარჩენი კი ინფრასტრუქტურულ პროექტებს უნდა მოხმარდეს. ექვს თვეზე ნაკლები გავიდა და ბევრი კლუბი უფრო მკაცრი წესების შემოღებას ითხოვს.

გარდიანის ინფორმაციით, განიხილება ორი შესაძლო მოდელი: კლუბების სამწლიან პერიოდში დასაშვები ზარალის ზღვარი და „ფუფუნების გადასახადი“. მეორე მოდელის მიხედვით, მფლობელის მიერ დადგენილ ზღვარზე მეტი ინვესტიციის 50% მეტოქე კლუბებს გადაუნაწილდება. უპირატესობას პირველ წინადადებას ანიჭებენ.

დამატებითი ხარჯვითი შეზღუდვების შემოღებას პროფესიონალ ფეხბურთელთა ასოციაციის სამართლებრივი დავა არ აბრკოლებს. ასოციაციამ არსებული წესები გაასაჩივრა და აგვისტოში სამართალწარმოება დაიწყო. მისი მტკიცებით, კლუბებმა პროფესიული მოლაპარაკებისა და საკონსულტაციო კომიტეტში წევრობის პირობები არ დაიცვეს.

მესამე და მეოთხე ლიგების მცდელობა, ხელფასების ლიმიტები შესაბამისად 2,5 მილიონ და 1,5 მილიონ ფუნტად დაეწესებინათ, 2021 წელს შეწყდა. მანამდე პროფესიონალ ფეხბურთელთა ასოციაციამ საქმე დამოუკიდებელ საარბიტრაჟო პანელს გადასცა.

უფრო მკაცრი კონტროლის შესახებ დისკუსია დიდი ხანია მიმდინარეობს, თუმცა მას ახალი ბიძგი გასულ თვეში გამოქვეყნებულმა ანგარიშმა მისცა. დამოუკიდებელი საფეხბურთო მარეგულირებლის პირველმა კვლევამ აჩვენა, რომ ინგლისის საფეხბურთო ლიგისა და ეროვნულ ლიგაში კლუბების 94% ზარალით მუშაობს. ანგარიშის თანახმად, 96 კლუბიდან 32 მფლობელების ფინანსური დახმარების გარეშე ერთ თვესაც ვერ გაძლებდა.

გასულ ზაფხულს მიღებული ცვლილებებით შემცირდა კლუბების შემოსავლის ის წილი, რომლის ხელფასებზე დახარჯვაც შეიძლება. პირველად ამ გათვლაში მთავარი მწვრთნელების ხელფასებიც შეიტანეს. ახლა ზარალის შემცირებისკენ ახალი ნაბიჯის გადადგმას ცდილობენ. გასულ სეზონში მესამე ლიგის თითოეული კლუბის საშუალო ზარალი 7,5 მილიონი ფუნტი იყო, წინა სეზონში კი 5,3 მილიონი ფუნტი.

ერთ-ერთი მფლობელის თქმით, დამატებითი რეგულირება აუცილებელია, რადგან კლუბებმა არაერთხელ აჩვენეს, რომ ხარჯებს თავად ვერ აკონტროლებენ. მან აღნიშნა, რომ მესამე ლიგის კლუბების ხელფასებზე გაწეული ხარჯები ამ სეზონში 15%-ით გაიზარდა. ხუთი წლის წინ ლიგაში საუკეთესო ექვსეულისთვის საკმარისი ბიუჯეტი ახლა ქვედა სამეულში მოხვდებოდა.