ინტერმა და მილანმა ახალი საერთო სტადიონის გეგმები წარადგინეს

ინტერის გულშემატკივრები გალა-ღონისძიების გარეთ გეგმებს აპროტესტებენ

ინტერმა და მილანმა ახალი, გენერალის სახელობის სტადიონის გეგმები წარადგინეს. ის საერთო სან სიროს 2031-32 წლების სეზონიდან ჩაანაცვლებს.

იტალიის უმსხვილესი სადაზღვევო კომპანიის, გენერალის (Generali) მიერ დაფინანსებული სტადიონი 71 500 მაყურებელს დაიტევს. ორი კლუბის ხარჯი, სავარაუდოდ, 1,2 მილიარდი ევრო იქნება. გეგმები ხუთშაბათს, მილანის სფორცას ციხესიმაგრეში გამართულ გალა-ღონისძიებაზე წარადგინეს. თუმცა დამსწრე გულშემატკივართა ნაწილმა სან სიროს დანგრევის წინააღმდეგ პროტესტი გამოთქვა.

ბრიფინგის დაწყებამდე ცოტა ხნით ადრე ინტერის გულშემატკივართა ჯგუფი ციხესიმაგრის ეზოში შევიდა. მათ გაშალეს ბანერი წარწერით: „სან სიროს განათებას ვერასდროს ჩააქრობთ“ და სკანდირებდნენ: „ხელი შორს სან სიროსგან“. ახალი სტადიონის მშენებლობა 2028 წელს, ამჟამინდელი 75 000-ადგილიანი არენის ადგილზე დაიწყება.

არქიტექტორმა ნორმან ფოსტერმა განაცხადა, რომ გენერალის სახელობის სტადიონი „დაბალი იქნება, ხოლო კარების უკან ორივე ბოლოში მაღლდება“. პროექტზე ფოსტერთან ერთად მომუშავე სტადიონების სპეციალისტმა დევიდ მანიკამ დასძინა, რომ ციცაბო ტრიბუნების მიზანია, გულშემატკივრები მოედანთან რაც შეიძლება ახლოს დასხდნენ.

მანიკამ თქვა: „პროექტზე მუშაობისას ყველაზე მნიშვნელოვანი ის გავიაზრეთ, რომ სან სირო განცდაა. ის შენობაზე მეტია, განცდაა… ყველა ადგილი მოედანთან რაც შეიძლება ახლოს განვათავსეთ. უფრო ახლოს დასმა შეუძლებელია, ისეთი შეგრძნება იქნება, თითქოს ბალახზე ზიხარ“.

სტადიონი NFL-ის საერთაშორისო მატჩების, რაგბის თამაშებისა და კონცერტების მასპინძლობასაც შეძლებს. მილანმა და ინტერმა ამჟამინდელი სან სიროსა და მის მიმდებარე ავტოსადგომების შესაძენად 197 მილიონი ევრო გადაიხადეს. არსებული მოედნის დიდი ნაწილი მშენებლობის დასრულების მოახლოებისას დაინგრევა.

სან სირო, რომელიც ჯუზეპე მეაცას სტადიონის სახელითაცაა ცნობილი, 1926 წელს გაიხსნა და იტალიაში უდიდესი სპორტული სტადიონია. ის ევროპული ფეხბურთის ერთ-ერთ ყველაზე ცნობილ არენად მიიჩნევა, თუმცა ფართო მოდერნიზაცია სჭირდება, მიუხედავად იმისა, რომ არსებობის განმავლობაში რამდენჯერმე გარემონტდა.

გენერალის სახელობის სტადიონი შესაძლოა 2032 წლის ევროპის ჩემპიონატის მატჩებს უმასპინძლოს. ტურნირს იტალია და თურქეთი ერთობლივად უმასპინძლებენ. ფოსტერი და მანიკა მანამდე ახალ უემბლის სტადიონზეც თანამშრომლობდნენ. არქიტექტორის კომპანია Foster + Partners-მა მანჩესტერ იუნაიტედის ახალი, 100 000-ადგილიანი სტადიონის გეგმებიც შეიმუშავა.