iPhone Duo დეველოპერებს დასაკეც ეკრანზე მუშაობას ურთულებს

Appwrite-ის დეველოპერებთან ურთიერთობის სპეციალისტმა ათარვა დეოსთალემ შესავალ ბლოგპოსტში დაწერა: „დაკეცვა ინტერფეისის მოვლენაა, რომელსაც შიდა სისტემებისთვის შედეგები მოჰყვება. მოწყობილობის დაკეცვა და გაშლა ჩვეულებრივი გამოყენების ნაწილია. ამიტომ აპებმა მდგომარეობა უნდა შეინარჩუნონ და ეკრანის ცვლილებას გამართულად უპასუხონ“.

iPhone Duo, რომელიც Apple-მა გასულ კვირას წარადგინა, ორეკრანიანი სმარტფონია. კორპუსის ზედა მხარეს 5,4-დუიმიანი გარე ეკრანია, შიგნით კი უფრო დიდი, 7,6-დუიმიანი ეკრანი მდებარეობს. მოწყობილობის გახსნის ან დაკეტვისას ეკრანის შიგთავსი ავტომატურად და მოხდენილად ხილულ ეკრანზე გადადის.

Apple-მა ტექნიკური დოკუმენტაციის საცავი გამოაქვეყნა, რათა დეველოპერებს ახალი ფორმისთვის მომზადებაში დაეხმაროს. ახლა მისი შესწავლის დროა.

დასაკეცი სენსორული მოწყობილობა iOS 27.1-ზე იმუშავებს. ის შეუცვლელ iPhone აპებსაც გაუშვებს, თუმცა ისეთივე მოუხერხებლად, როგორც ჩვეულებრივი iPhone აპები iPad-ზე მუშაობს.

დეველოპერებმა ახალი ხერხები უნდა შეისწავლონ, რათა მათი აპები Apple-ის ახალ მობილურ მოწყობილობაზე მართლაც კარგად გამოიყურებოდეს.

დასაკეცი ფორმის გამო მომხმარებელმა შესაძლოა აპში მუშაობა ზედა ეკრანზე დაიწყოს. მოწყობილობის გახსნისას აპი შეუფერხებლად უნდა გადავიდეს დიდ ეკრანზე. ორივე ეკრანის თანაფარდობა ერთნაირია.

შიდა ეკრანის სრულად გამოსაყენებლად ტელეფონის ბოლომდე გაშლა აუცილებელი არ არის. ის შეიძლება „მაგიდის მდგომარეობაში“ დაიკეცოს, როცა ეკრანის ერთი ნახევარი ჰორიზონტალურადაა, მეორე კი პატარა ლეპტოპივით ვერტიკალურად დგას.

მოწყობილობა შეიძლება ნაწილობრივ გახსნილ „წიგნის მდგომარეობაშიც“ გამოიყენონ, როცა ნაკეცი ვერტიკალურადაა. შესაძლოა, ეს კონფიდენციალურობისთვის გამოდგეს. ვინ იცის, ადამიანების უსაზღვრო გამომგონებლობა ამ მოწყობილობებთან ურთიერთობის კიდევ რა გზებს მოიფიქრებს.

Apple-ის ProMotion ტექნოლოგიის წყალობით, ორივე ეკრანს 120 ჰერციანი ადაპტიური განახლების სიხშირე აქვს. ამიტომ აპში გადასვლები და თავად აპის ზომის ცვლილება თითქმის უოლტ დისნეის ანიმაციებივით გლუვი უნდა იყოს. ამასთან, აპმა მდგომარეობაც უნდა შეინარჩუნოს.

„გაყოფილი ხედის“ საშუალებით ეკრანზე ერთდროულად ორი აპის გაშვებაა შესაძლებელი. შესაბამისად, აპებმა ეკრანი სათანადოდ უნდა გაინაწილონ.

ახალი კონფიგურაციისთვის Apple საკუთარ Xcode პროგრამირების გარემოს აახლებს. 27.1-ის საცდელი ვერსია ამ თვის ბოლოს იქნება ხელმისაწვდომი.

დეოსთალემ აღნიშნა, რომ iPhone Duo-ს ეკრანი რამდენიმე მიზეზით სრულიად განსხვავებული გარემოა. ზომა უკვე ფიქსირებული მნიშვნელობა კი არა, დინამიკური დიაპაზონია. აპმა ხელმისაწვდომი ზომა განლაგების შექმნისას უნდა განსაზღვროს. შემდეგ ეკრანზე გამოყოფილი სივრცის ცვლილების შესაბამისად, აპმა ის მუშაობის მთელ პერიოდში უნდა დაარეგულიროს.