ისრაელმა დასავლეთ სანაპიროზე ოპერაცია დაიწყო

ორი ჯარისკაცის სასიკვდილოდ დაჭრის შემდეგ ისრაელის არმიამ დასავლეთ სანაპიროზე „ანტიტერორისტული ოპერაცია“ დაიწყო. არმიის ცნობით, იქ იარაღსა და ტერორისტულ ინფრასტრუქტურას ეძებენ. ისრაელის პრემიერ-მინისტრი ფართომასშტაბიანი სამხედრო ოპერაციითაც დაიმუქრა.

ისრაელის განცხადებით, დასავლეთ სანაპიროზე მომხდარი თავდასხმის საპასუხოდ, რომელსაც ორი ჯარისკაცი ემსხვერპლა, ქვეყანამ ჰებრონის რაიონში ანტიტერორისტული ოპერაცია დაიწყო.

ისრაელის არმიისა და შინაგანი უსაფრთხოების სამსახურის, შინ ბეთის, (Shin Bet) ერთობლივ განცხადებაში, რომელიც გვიან საღამოს ტელეგრამზე გამოქვეყნდა, ნათქვამია: „ძალებმა ტერიტორიის მიზანმიმართული, ზუსტი და მასშტაბური შემოწმება დაიწყეს, რათა ტერორისტული ინფრასტრუქტურა და იარაღი აღმოაჩინონ და გაანადგურონ“.

ოპერაციაში არმია, დაზვერვა, სასაზღვრო პოლიცია და სამოქალაქო ადმინისტრაცია მონაწილეობენ. ის იმ ტერიტორიით შემოიფარგლება, საიდანაც ტერორისტები მოქმედებდნენ, და, სავარაუდოდ, რამდენიმე დღე გაგრძელდება. განცხადების თანახმად, დაზარალებული ტერიტორიის მცხოვრებლებს სამი განსაზღვრული გასასვლელიდან შეეძლებათ ტერიტორიის დატოვება, მას შემდეგ, რაც მათ გამოკითხავენ.

ისრაელის მთავრობა დასავლეთ სანაპიროს სრულად ჩაკეტვას ამზადებს.

პარასკევს დილით ჰებრონის მახლობლად მდებარე საკონტროლო-გამშვებ პუნქტზე ორი თავდამსხმელი ისრაელელ ჯარისკაცებს პისტოლეტითა და ავტომატური შაშხანით ესროლა. არმიის ცნობით, მათ 20 და 23 წლის ჯარისკაცები მოკლეს, კიდევ სამი კი დაჭრეს, შემდეგ კი თავად დახოცეს.

პრემიერ-მინისტრ ბენიამინ ნეთანიაჰუს განცხადებით, თავდამსხმელები სამოქალაქო პირებზე უფრო დიდი თავდასხმის მოწყობას გეგმავდნენ. მისი თქმით, შემთხვევის ადგილზე დიდი რაოდენობით იარაღი და საბრძოლო მასალა იპოვეს. ნეთანიაჰუმ თავდასხმაში ტერორისტული ორგანიზაცია ჰამასიც დაადანაშაულა. ჰამასმა წერილობით განცხადებაში თავდასხმა მოიწონა, თუმცა პასუხისმგებლობა პირდაპირ არ აიღო.

თავდასხმის შემდეგ ჰებრონისკენ მიმავალი გზები გადაკეტეს. ნეთანიაჰუმ ქალაქის ჩაკეტვის ბრძანება გასცა. მან ასევე დაავალა არმიას, დასავლეთ სანაპიროს სრული ჩაკეტვისთვის მოემზადოს.

ნეთანიაჰუმ დასავლეთ სანაპიროზე ფართომასშტაბიანი სამხედრო ოპერაცია კვლავ დააანონსა. მისი თქმით, თავდაცვის მინისტრი და ის „იუდეასა და სამარიაში ძალიან მასშტაბურ სამხედრო ოპერაციას განიხილავენ, როგორიც ექვსდღიანი ომის შემდეგ არ ჩატარებულა“. ნეთანიაჰუმ დასავლეთ სანაპიროს ბიბლიური სახელები გამოიყენა. მან დასძინა: „არმია მზადაა, ის განახორციელოს, და ჩვენ დროს შევარჩევთ. მაგრამ ოპერაცია ჩატარდება“.

ისრაელმა 1967 წლის ექვსდღიანი ომის დროს, სხვა ტერიტორიებთან ერთად, დასავლეთ სანაპირო და აღმოსავლეთ იერუსალიმი დაიპყრო. მას შემდეგ ეს ტერიტორიები ოკუპირებული აქვს.