კალიფორნიაში ტყის ხანძრებმა სახლები გაანადგურა

ორინჯის ოლქის სახანძრო სამსახურმა (Orange County Fire Authority) X-ზე დაწერა, რომ ე.წ. ნორტეს ხანძარმა დაახლოებით 465 აკრი (188 ჰექტარი) მოიცვა. შეძლებულ სან-ხუან-კაპისტრანოში სულ მცირე ოთხი სახლი დაზიანდა.

მეხანძრეები სწრაფად გავრცელებული ცეცხლის შეკავებას ცდილობდნენ. ამ დროს ბორცვებიდან ამომავალი შავი კვამლი რამდენიმე მილის მანძილიდან ჩანდა.

სააგენტომ განაცხადა: „მეხანძრეები ცეცხლს ხმელეთიდან და ჰაერიდან ინტენსიურად ებრძვიან“. უწყებამ მოსახლეობას არაერთხელ მოუწოდა, რომ ტერიტორიას მოშორებოდა.

ნორტეს ხანძარი სანაპირო ქალაქ სან-კლემენტეში გაჩნდა. ქარმა ცეცხლი სან-ხუან-კაპისტრანოსკენ წაიღო.

აშშ-ის ამინდის ეროვნულმა სამსახურმა (National Weather Service) „დიდი ხანძრებისა და ცეცხლის სწრაფი გავრცელების მაღალი რისკის“ შესახებ გააფრთხილა. საფრთხე განსაკუთრებით ლოს-ანჯელესისა და ვენტურის ოლქებს, ასევე სან-ლუის-ობისპოსა და სანტა-ბარბარის ოლქების მთებსა და მთისწინეთს ემუქრება.

ტყის ხანძრები სანტა-ანას ძლიერი ქარების, დაბალი ტენიანობისა და სეზონისთვის უჩვეულოდ მაღალი ტემპერატურის გამო მძაფრდება.

სინოპტიკოსების თქმით, მთებში ქარის სიჩქარემ საათში 50-70 მილს (80-110 კილომეტრს) მიაღწია. სანაპიროსა და ხეობებში საათში 35-დან 55 მილამდე სიჩქარის ქარი დაფიქსირდა.

ხელისუფლებამ ელექტრონაპერწკლების წარმოქმნის რისკის შესამცირებლად ელექტროენერგიის მიწოდება შეწყვიტა. ძლიერ ქარს ასეთი ნაპერწკლების გავრცელება შეეძლო. შედეგად, შტატში ათასობით ადამიანი ელექტროენერგიის გარეშე დარჩა.