კიბერშეტევისას ნავთობმზიდის ძრავის სისტემაზე წვდომა მოიპოვეს

ანგარიშის თანახმად, გამოძიების ფედერალური ბიუროსა და სანაპირო დაცვის თანამშრომლები აგვისტოს ბოლოს სუპერნავთობმზიდზე ავიდნენ. ეს მას შემდეგ მოხდა, რაც გემთან რადიოკავშირი გაწყდა და უწყებებმა მისი სისტემების ხელყოფის ნიშნები მიიღეს. იმავე თვეში მექსიკის ყურეში კიდევ ერთ გემზე ავიდნენ სავარაუდო კიბერსაფრთხის გამო. მას შემდეგ უზარმაზარ გემს იკვლევენ. იმ დროს სუპერნავთობმზიდი სრულად დატვირთული იყო და ტეხასის ქალაქ გალვესტონისკენ მიემართებოდა. ბლუმბერგის ცნობით, „VL Prosperity“ ნავთობით ეგვიპტეში დაიტვირთა. აშშ-ისკენ მიმავალმა გიბრალტარის სრუტეში საკომუნიკაციო კავშირი დაკარგა.

ინციდენტი ხაზს უსვამს საფრთხეს, რომელსაც კიბერშეტევები ნაოსნობას უქმნის. ბლუმბერგის ცნობით, სექტემბრის შუა რიცხვებში აშშ-ის უწყებები მსოფლიოს მასშტაბით თითქმის 20 გემს აკვირდებოდნენ. თუ რომელიმე მათგანი აშშ-ის პორტისკენ გაემართება, სანაპირო დაცვა წინასწარ შეტყობინებას მოითხოვს. გემების სისტემებზე წარმატებული კიბერშეტევები იშვიათია, თუმცა მათ შორს მიმავალი შედეგები შეიძლება მოჰყვეს. ექსპერტმა ალექს სუხანოვმა თქვა: „ესენი მსოფლიოში ყველაზე დიდი მოძრავი ობიექტებია და მათ მსოფლიო ეკონომიკა გადააქვთ“. კიდევ ერთი ექსპერტის თქმით, სახიფათო მასალით დატვირთულ დიდ გემზე კონტროლის დაკარგვა ყველაზე უარესი სცენარია. თუმცა გემების უმეტესობას ეკიპაჟისთვის სათადარიგო მართვის სისტემა აქვს.