კლიერი მძიმე ტრავმის შემდეგ დაბრუნებას აპირებს

ავსტრალიის ნაკრების 28 წლის ვარსკვლავი სამშობლოში გასამართ ტურნირზე ვერ ითამაშებს. კვირას, NRL-ის პლეი-ოფში, მისი „პენრით პანთერსი“ (Penrith Panthers) „ნიუკასლ ნაითსთან“ (Newcastle Knights) დამარცხდა. მატჩისას კლიერიმ მარცხენა კოჭის ღია მოტეხილობა და ამოვარდნილობა მიიღო.

ოთხი წლის წინ კლიერი ავსტრალიას მანჩესტერში მსოფლიო ჩემპიონატის მოგებაში დაეხმარა. ფინიქს კროსლანდის ვარდნისას მიღებული ტრავმის შემდეგ ნახევარმცველს საავადმყოფოში გადაუდებელი ოპერაცია დასჭირდა.

„ნაითსის“ ჰუკერი კროსლანდი ე.წ. „ჰიპ-დროპ“ ვარდნისთვის გააძევეს. NRL-მა ასეთი ვარდნა 2020 წელს აკრძალა.

„ჰიპ-დროპ“ ვარდნისას მცველი მორბენალს ორივე ხელით იჭერს ან მკლავებს შემოხვევს. შემდეგ თეძოებს ან სხეულის ქვედა ნაწილს ატრიალებს ან დაბლა უშვებს, მეტოქის მუხლს ქვემოთ ფეხზე ეცემა და მას აქცევს.

კლიერიმ Instagram-ზე დაწერა: „ოპერაცია დასრულდა... დიდი მადლობა ყველას, ვინც გამომეხმაურა, მხარდაჭერა დაუჯერებელი იყო“.

მან დასძინა: „გუშინდელი დღე საშინელი იყო, მაგრამ ესეც გზის ნაწილია. მომხდარმა კიდევ უფრო დამაფასებინა ადამიანები, რომლებიც ჩემ გვერდით არიან. დავბრუნდები“.

კლიერიმ კვირის მატჩი სათადარიგოთა სკამზე დაიწყო, რადგან მანამდე მარჯვენა ტერფიც ჰქონდა დაზიანებული, რომელშიც ძვალი გატეხილი იყო.

მისმა მამამ და „პანთერსის“ მთავარმა მწვრთნელმა, აივან კლიერიმ, მატჩის შემდეგ განაცხადა, რომ მის შვილს ორივე ტერფზე ოპერაცია ჩაუტარდებოდა.

მწვრთნელმა თქვა: „ვფიქრობ, სწორედ ამიტომ განვიცადე მის თავს მომხდარი კიდევ უფრო მძაფრად. ვიცოდი, რამდენი იშრომა და რა გადაიტანა, რათა დღეს ეთამაშა“.

ვარდნის გამო კროსლანდის საქმე NRL-ის სადისციპლინო კომისიას გადაეცა. სავარაუდოდ, მას ხანგრძლივი დისკვალიფიკაცია ემუქრება. ამის გამო ის გამოტოვებს კვირის NRL-ის დიდ ფინალს, რომელშიც „ნიუკასლი“ „სიდნი რუსტერსს“ (Sydney Roosters) შეხვდება. სასჯელმა შესაძლოა მსოფლიო ჩემპიონატზე ახალი ზელანდიის ნაკრებში მის თამაშსაც შეუშალოს ხელი.

მსოფლიო ჩემპიონატის პირველ მატჩში ავსტრალია ახალ ზელანდიას 15 ოქტომბერს, სიდნეიში, ბრიტანეთის ზაფხულის დროით 10:05 საათზე შეხვდება. ეს გუნდები 15 ნოემბერს, ბრისბენში, გრინვიჩის დროით 08:35 საათზე გასამართი ფინალის მთავარი ფავორიტებიც არიან.