მადრიდთან მატარებლების შეჯახების შემდეგ ესპანეთის თასის ყველა მატჩი გადაიდო

ოთხშაბათს გასამართი ესპანეთის „კოპა დელ რეის“ 24-ვე მატჩი გადაიდო, სულ მცირე 68 ადამიანის დაღუპვის შემდეგ. ეს გადაწყვეტილება მადრიდთან მომხდარი მატარებლის ავარიის მსხვერპლთა პატივსაცემად მიიღეს.

მატარებლების შეჯახებისა და რელსებიდან გადასვლის დროს მათში 500-ზე მეტი მგზავრი იმყოფებოდა. ავარია ტოლედოში მოხდა.

ესპანეთის ფეხბურთის ფედერაციის (RFEF) მიერ გავრცელებულ განცხადებაში ნათქვამია, რომ გადაწყვეტილება მსხვერპლთა მიმართ სოლიდარობის ნიშნად მიიღეს.

ოთხშაბათს პირველი ეტაპის მატჩებში უმაღლესი დივიზიონის ხუთი გუნდი უნდა გამოსულიყო: „ლევანტე“, „ალავესი“, „ვალენსია“, „სელტა ვიგო“ და „რეალ ბეტისი“.

ესპანეთის წამყვანი კლუბები, მათ შორის „რეალ მადრიდი“, „ბარსელონა“ და „ატლეტიკო მადრიდი“, ტურნირში მხოლოდ 32 საუკეთესო გუნდს შორის მოხვედრის ეტაპიდან ჩაერთვებიან.

ოთხშაბათს საღამოს „ბაიერნთან“ „რეალ მადრიდის“ ქალთა გუნდის ჩემპიონთა ლიგის მატჩის წინ წუთიერი დუმილი გაიმართა. „რეალის“ ფეხბურთელებს შავი სამკლაურები ეკეთათ.

„ბარსელონამ“ სოციალურ ქსელში ავარიის მსხვერპლთა მიმართ „ღრმა მწუხარება“ გამოხატა.

„ფკ ბარსელონა“ ღრმა მწუხარებას გამოთქვამს ლოს იებენესსა და ურდას შორის, ტოლედოში მომხდარი მძიმე სარკინიგზო ავარიის მსხვერპლთა გამო.

კლუბს სურს, მსხვერპლთა ოჯახის წევრებსა და მეგობრებს თანადგომა და სოლიდარობა გამოუცხადოს, ხოლო დაშავებულებს მალე გამოჯანმრთელება უსურვოს.“

„რეალ მადრიდმა“ საკუთარ ვებგვერდზე საგანგებო სამსახურებს „სრული მხარდაჭერა“ გამოუცხადა.

„რეალ მადრიდი“ ღრმა მწუხარებას გამოთქვამს ტოლედოს პროვინციაში მომხდარი ტრაგიკული სარკინიგზო ავარიის გამო.

კლუბი უსამძიმრებს დაღუპულთა ოჯახის წევრებსა და ახლობლებს, ასევე თანადგომასა და სოლიდარობას უცხადებს დაშავებულებსა და ამ საშინელი ავარიით დაზარალებულ ყველას.

„რეალ მადრიდს“ სურს, სრული მხარდაჭერა გამოუცხადოს საგანგებო სამსახურებსა და ყველას, ვინც სამაშველო სამუშაოებში მონაწილეობს. კლუბი ამ ღრმა მწუხარების ჟამს დაზარალებულთა ტკივილს იზიარებს.“

ხუთშაბათის მატჩები ძალაში რჩება. RFEF-ს ოთხშაბათისთვის გადადებული თამაშების ახალი განრიგი ჯერ არ გამოუქვეყნებია.

ესპანელმა ჩოგბურთელმა კარლოს ალკარასმაც გამოხატა „ღრმა მწუხარება“ ავარიით დაზარალებულთა მიმართ.

„მთელ ჩემს სიყვარულსა და მხარდაჭერას ვუგზავნი მსხვერპლთა ოჯახის წევრებს და ამ მძიმე პერიოდში დაზარალებულ ყველა ადამიანს“, თქვა „იქსზე“ შვიდგზის დიდი სლემის ჩემპიონმა.