Microsoft 365-ის მომხმარებლები OneDrive-ში 4 ტბ-მდე სივრცეს დაკარგავენ

Microsoft 365-ის Family, Premium ან Pro პაკეტების მომხმარებლებმა, რომლებიც OneDrive-ის გამოყოფილ სივრცეს სრულად იყენებენ, ეს გაფრთხილებად უნდა მიიღონ: სივრცე შემცირდება.

Microsoft-მა ამ კვირაში მხარდაჭერის გვერდზე Microsoft 365-ის საერთო საცავის ლიმიტების ცვლილებები აღწერა. კომპანია მათ მომხმარებლებისთვის მეტი მოქნილობის შეთავაზებად წარმოაჩენს, თუმცა ცვლილებები მოცულობის მასშტაბურ შემცირებასაც ნიშნავს.

წინა სქემით, სამივე პაკეტში თითოეულ მომხმარებელს 1 ტბ სივრცე ეძლეოდა. მომხმარებელთა მაქსიმალური რაოდენობა ექვსი იყო, საერთო მოცულობა კი 6 ტბ-ს შეადგენდა.

ახალი ლიმიტით, სივრცეს ანგარიშის ყველა მომხმარებელი გაინაწილებს, ხოლო მათი მაქსიმალური რაოდენობა კვლავ ექვსი იქნება. Family და Premium პაკეტების მომხმარებლები ექვს ადამიანზე გასანაწილებლად 2 ტბ სივრცეს მიიღებენ. Pro პაკეტის მომხმარებლები კი 5 ტბ-ს გაინაწილებენ.

შედეგად, სრულად გაზიარებული Family და Premium გამოწერები საერთო მოცულობის 4 ტბ-მდე სივრცეს დაკარგავენ. Pro გამოწერების მოცულობა 1 ტბ-მდე შემცირდება. მოქმედი მომხმარებლების ნაწილმა შესაძლოა დროებითი დამატებითი სივრცე მიიღოს.

დადებითი მხარე ისაა, რომ თითოეული ადამიანისთვის დაწესებული 1 ტბ-იანი ფიქსირებული ზღვარი აღარ იარსებებს, თუ საერთო საცავში საკმარისი ადგილი დარჩება.

Microsoft-მა ცვლილება ასე დაასაბუთა: „მიზანი უფრო მოქნილი გამოცდილების შეთავაზებაა. საერთო საცავი უზრუნველყოფს, რომ ერთ ადამიანს სივრცე არ ამოეწუროს, როცა სხვა წევრებს გამოუყენებელი ადგილი აქვთ“.

ეს შესაძლოა ხელსაყრელი იყოს ანგარიშის იმ მომხმარებლებისთვის, რომლებიც დიდ მოცულობას იყენებენ და ახლა 1 ტბ-იან ზღვარს გადააჭარბებენ. თუმცა, თუ საოჯახო პაკეტის ოთხი მომხმარებელი თითოეული 500 გბ-ს იყენებს და კიდევ ვინმეს რამის ატვირთვა სურს, სივრცე აღარ ექნება. დამატებითი OneDrive სივრცის შეძენა კვლავ შესაძლებელი იქნება.

Microsoft-ს, როგორც ჩანს, ესმის, რომ მომხმარებლებმა ცვლილება შესაძლოა სივრცის შემცირებად აღიქვან. ხშირად დასმული კითხვების სექციაში კომპანიამ დასვა კითხვა: „ეს ცვლილება სივრცის შემცირებაა?“ პასუხში Microsoft-მა კვლავ „მოქნილობას“ გაუსვა ხაზი და აღნიშნა: „მაგალითად, თუ გამოწერის მფლობელი პაკეტს არავის უზიარებს, მას შეუძლია საერთო სივრცე სრულად გამოიყენოს“. ინდივიდუალური პაკეტები უკვე არსებობს, თუმცა მათი მაქსიმალური მოცულობა 1 ტბ-ია.

Microsoft-ს, როგორც ჩანს, მოსალოდნელი უკმაყოფილებაც ესმის. ცვლილების შესახებ მხარდაჭერის გვერდზე კომპანიამ გამოწერის გაუქმების ინსტრუქციებიც განათავსა.