მკვლევრებმა შეხებით მოძრავი მინიატიურული დრონი შექმნეს

საჰაერო ფიზიკური ურთიერთქმედებისა და სხეულთან შერწყმული ინტელექტის ასოცირებულმა პროფესორმა, დოქტორმა სალუა ჰამაზამ გამოცემას განუცხადა: „ჩვენი მიზანია, დრონები მდიდარი ტაქტილური აღქმით აღვჭურვოთ. ეს ჰაერში საგნებით მანიპულირებისთვის არ გვჭირდება. გვინდა, შეხებით ნავიგაციის ახალი კონცეფცია შევქმნათ: შეხების გამოყენებით უცნობი გარემო გამოვიკვლიოთ და მასში ვიფრინოთ“.

ჰამაზამ დასძინა: „თუმცა, ამას სირთულე ახლავს: დრონზე ტაქტილური აღქმისთვის სისტემა მსუბუქი, სწრაფი რეაგირებისა და დაბალი ენერგომოხმარების უნდა იყოს. ბუნებით შთაგონებულებმა პასუხი ულვაშებში ვიპოვეთ“.

მღრღნელები და სხვა პატარა ძუძუმწოვრები ვიბრისებს, უფრო გავრცელებული სახელით ულვაშებს, ვიწრო და ბნელ ადგილებში გადასაადგილებლად იყენებენ. ჯგუფმა ეს უნარი დრონის წინა ნაწილზე ორი ულვაშის დამაგრებით გაიმეორა. ისინი კუთხით ზემოთაა მიმართული და თითოეული ძირში სამ მინიატიურულ წნევის სენსორს უკავშირდება. ზედაპირთან ულვაშის შეხებისას სენსორებში ცვლილებები დრონს შედარებითი სიღრმისა და მდებარეობის განსაზღვრის საშუალებას აძლევს. შემდეგ დრონი გარშემო ზედაპირებს აფასებს, დაბრკოლებებს გვერდს უვლის და ზედაპირს მიჰყვება. მას შეგრძნებული მონაცემებით ტერიტორიის რუკის შედგენაც შეუძლია.

ჰაერის ნაკადს სისტემის მუშაობის შეფერხება შეუძლია, რაც დრონებზე ულვაშების დამაგრების კიდევ ერთი სირთულეა. ამიტომ მკვლევრებმა მსუბუქი, რეალურ დროში მოქმედი დამუშავების სისტემა შექმნეს. ის მცირე ცვლილებებს ითვალისწინებს და ულვაშებს მილიმეტრულ სიზუსტეს ანიჭებს. პროგრამა ტურბულენტობას ზედაპირთან შეხებისგან არჩევს და მხოლოდ 34 კილობაიტ მეხსიერებას იყენებს.

მკვლევარმა ჩაოსიან იემ TechXplore-ს განუცხადა: „გვინდოდა გვეჩვენებინა, რომ შეხებითი აღქმისთვის ზომისა და გამოთვლითი სიმძლავრის დათმობა აუცილებელი არ არის. ტაქტილური აღქმის მთელი სისტემა ბორტზე მხოლოდ 34 კილობაიტ მეხსიერებას იყენებს. ეს პატარა დრონს გარემოს რეალურ დროში შეგრძნებისა და მასზე რეაგირების საშუალებას აძლევს“.

ეს მსუბუქი სისტემა მსოფლიოს უსწრაფესი დრონისთვის გამოსადეგი ვერ იქნება. თუმცა, სამძებრო-სამაშველო სამუშაოებისთვის განკუთვნილი პატარა დრონებისთვის ის კარგი არჩევანია. მაშველებს ასეთი დრონების ადგილზე გამოყენება ჩამონგრეული ნაგებობების გამოსაკვლევად შეეძლებათ, ადამიანებისა და ცხოველების საფრთხეში ჩაგდების გარეშე. სისტემა ასევე კარგად შეავსებდა სამაშველო სამუშაოებისთვის შექმნილ, 3D-პრინტერით დაბეჭდილ კიბორგ ტარაკანს.