ნატო შავ ზღვაში ძალებს ზრდის რუსეთის სასიკვდილო თავდასხმების ფონზე

რუსეთის ომი უკრაინაში ნატოს საზღვრებს მიუახლოვდა, რადგან სამიზნედ სასოფლო-სამეურნეო ტვირთის გადამზიდავი გემები იქცა. ამის გამო შეშფოთება იზრდება.

სავაჭრო გემებზე რუსეთის თავდასხმების ბოლოდროინდელი სასიკვდილო ესკალაციის ფონზე, ნატო შავ ზღვაში დამატებით სამხედრო საშუალებებს განათავსებს. სამშაბათს თავდასხმის სამიზნე კიდევ ხუთი გემი გახდა.

რუსეთის სამხედრო უწყებამ განაცხადა, რომ უკრაინის პორტ რენიში სამ სატვირთო გემს დაარტყა. მისივე ცნობით, დარტყმა მიაყენა კიდევ ორ სატვირთო გემს, რომლებიც ოდესისკენ მიემართებოდნენ.

რუსეთი მიზანში იღებს გემებს, რომლებსაც უკრაინის პორტებიდან მარცვლეული და სხვა სასოფლო-სამეურნეო ტვირთი გააქვთ. ეს გადაზიდვები ქვეყნის ეკონომიკისთვის უმნიშვნელოვანესია. თავდასხმებმა კონფლიქტი ნატოს საზღვრებამდე მიიტანა. ლონდონის საზღვაო დაზღვევის ბაზრის მიერ შემოღებული ახალი, მაღალი რისკის კატეგორია ახლა თითქმის მთელ შავ ზღვას მოიცავს. გამონაკლისია რუმინეთის, ბულგარეთისა და თურქეთის ტერიტორიული წყლები.

სამოქალაქო მეზღვაურებს შორის დაღუპულთა რაოდენობა მკვეთრად იზრდება, რის გამოც შავი ზღვის მარშრუტები მსოფლიოში ყველაზე სახიფათო გახდა. ნატომ გამოაცხადა, რომ თავდაცვითი სამხედრო ალიანსი რეგიონში სათვალთვალო საშუალებებს დაამატებს.

ნატოს პრესსპიკერმა ელისონ ჰარტმა განაცხადა: „დღეს ნატოს ელჩები ჩრდილოატლანტიკურ საბჭოში შეიკრიბნენ, რათა შავი ზღვის უსაფრთხოება განეხილათ. ნატომ აღმოსავლეთ ფლანგზე ჩვენი პოზიციები უკვე გააძლიერა, მათ შორის, დრონების საწინააღმდეგო შესაძლებლობებით. ნატო რეგიონში დამატებით საშუალებებს გაგზავნის, მათ შორის, თვალთვალის, დაზვერვისა და ექსპერტიზის მხარდასაჭერად“.

განთავსებული საშუალებები მოიცავს საზღვაო საპატრულო თვითმფრინავებს, სარადარო სისტემებს, დრონებსა და დაზვერვის თანამშრომლებს. რუსეთის ომის უკრაინის ფარგლებს გარეთ სულ უფრო მეტად გავრცელება შეშფოთებას აძლიერებს. ასევე იზრდება ნატოსთან შემდგომი დაპირისპირების საფრთხე.

შეშფოთება მას შემდეგ გაძლიერდა, რაც რუსეთის სავარაუდო თავდასხმებმა სულ უფრო მეტად შეაღწია ბულგარეთისა და რუმინეთის ტერიტორიულ წყლებსა და განსაკუთრებულ ეკონომიკურ ზონებში. რუმინეთმა შაბათ-კვირას ავიაგამანადგურებლები გამოიყენა, რათა თავის ტერიტორიაზე ორი სავარაუდო რუსული დრონი ჩამოეგდო.

რუმინეთის თავდაცვის მინისტრმა რადუ მირუცამ განაცხადა, რომ ისინი, სავარაუდოდ, უახლესი თაობის რუსული დრონები იყო. მისი თქმით, დრონები ავიაგამანადგურებლების მსგავსი სიჩქარით დაფრინავდნენ.

მირუცამ თქვა: „გასულ ღამეს ისინი 450 კმ/სთ სიჩქარით დაფრინავდნენ. ეს გვაფიქრებინებს, რომ ისინი რუსული წარმოების, ტურბოხრახნიანი ძრავით აღჭურვილი Geran-4-ის დრონები იყო“. მან დასძინა: „ასეთი დრონები პირველად ჩამოვაგდეთ“.