ნიგერია ოპტიკურ-ბოჭკოვან ქსელს სამ წელიწადში დაასრულებს

მინისტრმა განაცხადა, რომ ნიგერია 90 000 კილომეტრის სიგრძის ოპტიკურ-ბოჭკოვანი საკაბელო ქსელის მოწყობას სამ წელიწადში დაასრულებს. ამით ქვეყანა მსოფლიო ბანკისა და აფრიკის განვითარების ბანკის (African Development Bank) მიერ მხარდაჭერილი პროექტის თავდაპირველ ვადას შეამცირებს.

ციფრული ეკონომიკისა და კომუნიკაციების მინისტრმა ბოსუნ ტიჯანიმ განაცხადა, რომ 2 მილიარდი დოლარის პროექტი თავდაპირველად ხუთ წელიწადზე იყო გათვლილი. პროექტი ნიგერიის გეგმის ძირითადი ნაწილია და ინტერნეტზე წვდომის არმქონე 40 მილიონი ადამიანის დაკავშირებას ითვალისწინებს. ტიჯანიმ დასძინა, რომ ციფრული კავშირის გეგმის კიდევ ერთი მთავარი ნაწილი, 3 700 სატელეკომუნიკაციო ანძის დამონტაჟება, მომდევნო ორ წელიწადში დასრულდება.

ტიჯანიმ სამშაბათს, ნიუ-იორკში, Semafor-ის ღონისძიებაზე „შემდეგი 3 მილიარდი“ (The Next 3 Billion) განაცხადა: „ჩვენ არ გვაქვს სრულფასოვანი კავშირი, რომელიც ნამდვილად საჭიროა იმ ინოვაციებით სარგებლობისთვის, რომლებსაც ახლა ვხედავთ“.

ნიგერია აფრიკის ყველაზე მრავალრიცხოვანი მოსახლეობის მქონე ქვეყანა და ციფრული ტექნოლოგიების მზარდი ბაზარია. თუმცა, ინტერნეტზე წვდომის ხარვეზების გამო, ინფრასტრუქტურაში მეტი ინვესტიციაა საჭირო, რათა ქვეყნის 220 მილიონი მცხოვრების უმრავლესობამ ინტერნეტით სარგებლობა შეძლოს.

ინტერნეტის გამოყენების კუთხითაც მნიშვნელოვანი სხვაობაა. არაკომერციული ორგანიზაციის, აფრიკაში ციფრული წვდომის პარტნიორობისა (Partnership for Digital Access in Africa) და სატელეკომუნიკაციო გაერთიანება GSMA-ს ანგარიშის შეფასებით, ქვეყნის მოსახლეობის ნახევარზე მეტი ინტერნეტით დაფარულ ტერიტორიებზე ცხოვრობს, მაგრამ მას არ იყენებს. არაკომერციული ორგანიზაცია ინტერნეტკავშირის გაფართოებაზე მუშაობს.

ნიგერიამ ხელოვნური ინტელექტის სტრატეგიის დოკუმენტი გასულ წელს წარადგინა. ქვეყანა ტექნოლოგიის გამოყენებით 2030 წლისთვის ტრილიონდოლარიანი ეკონომიკის შექმნას ისახავს მიზნად. მინისტრმა აღნიშნა, რომ ჩამორჩენის თავიდან ასაცილებლად ქვეყანას ადგილობრივი შესაძლებლობების განვითარება და მონაცემების შენახვის წესის შეცვლა სჭირდება.

ტიჯანიმ თქვა: „თუ ნამდვილად გვსურს, რომ ხელოვნური ინტელექტი ყველასთვის ხელმისაწვდომი იყოს, გამოთვლით რესურსებზე საუბრის დაწყებამდეც უნდა უზრუნველვყოთ ქვეყნების უმრავლესობის რეალობის გაციფრულება. ჩვენი მსგავსი ქვეყნისთვის საწყისი ნაბიჯი ადამიანურ უნარებში ინვესტირებაა“.