ფიფა ქალთა მსოფლიო ჩემპიონატის საპრიზო ფონდს გააორმაგებს, თუმცა თანაბარი ანაზღაურება არ იქნება

ფიფას ადმინისტრაცია 2027 წელს ბრაზილიაში გასამართი ქალთა მსოფლიო ჩემპიონატისთვის საპრიზო თანხის სულ მცირე გაორმაგებას შესთავაზებს. ამის შესახებ წყარომ ESPN-ს დაუდასტურა.

წინადადებას დეკემბერში ფიფას მომდევნო შეხვედრაზე წარადგენენ. მის დასამტკიცებლად ფიფას სრულ საბჭოს თანხმობა დასჭირდება.

თუმცა შემოთავაზებული ზრდის მიუხედავად, საპრიზო თანხა კაცთა ტურნირზე გაცემულ მთლიან თანხას მაინც ჩამორჩება. ეს ასე იქნება ფიფას პრეზიდენტ ჯანი ინფანტინოს მიერ გაცხადებული მიზნების მიუხედავად.

ფიფას პრეზიდენტმა ჯანი ინფანტინომ 2023 წელს თქვა: „ჩვენი მიზანი, რა თქმა უნდა, 2026 წლის კაცთა და 2027 წლის ქალთა მსოფლიო ჩემპიონატებზე თანაბარი ანაზღაურების უზრუნველყოფა იქნებოდა“.

„ეს არის მიზანი, რომელიც საკუთარ თავს დავუსახეთ. ფიფა მეტ ძალისხმევას იჩენს, თუმცა, სამწუხაროდ, ინდუსტრიაში ყველა ასე არ იქცევა. მაუწყებლებმა და სპონსორებმა ამ მხრივ მეტი უნდა გააკეთონ, ფიფასთვის, კონფედერაციებისთვის, წევრი ასოციაციებისთვის და ყველასთვის. ფიფა ქალთა მსოფლიო ჩემპიონატზე კაცთა მსოფლიო ჩემპიონატთან შედარებით 10-დან 100-ჯერ ნაკლებ შეთავაზებას იღებს“, დასძინა ინფანტინომ.

2023 წლის ქალთა მსოფლიო ჩემპიონატზე რეკორდული, ჯამში 150 მილიონი დოლარის ფინანსური პაკეტი გაიცა. ეს 2019 წლის ტურნირთან შედარებით 300%-იანი ზრდა იყო. თანხაში შედიოდა 110 მილიონი დოლარი უშუალოდ საპრიზო თანხისთვის, ხოლო დანარჩენი მოსამზადებელ დაფინანსებასა და კლუბებისთვის განკუთვნილ სარგებელზე გადანაწილდა.

ფიფამ დაადასტურა, რომ 2027 წლის ქალთა მსოფლიო ჩემპიონატში მონაწილე ყველა ქვეყნისთვის მოსამზადებელი დაფინანსებაც გაიზრდება. თითოეული ასოციაცია 2,5 მილიონს მიიღებს, რაც 2026 წლის კაცთა მსოფლიო ჩემპიონატში მონაწილე ქვეყნებისთვის გაცემული თანხის ტოლია.

ფიფას ცნობით, თანხა 2026 წლის დეკემბრამდე გაიცემა.

აშშ-ის ქალთა და კაცთა ნაკრებები მსოფლიო ჩემპიონატზე საპრიზო თანხას თანაბრად იყოფენ. ეს 2022 წელს აშშ-ის ფეხბურთის ფედერაციის მიერ რატიფიცირებული კოლექტიური შეთანხმებებით არის გათვალისწინებული.