პოლონეთში რუსი არტისტის მკვლელობის საქმეზე მეორე ეჭვმიტანილი დააკავეს

პოლონეთის დაზვერვის სამსახურების კოორდინატორმა ტომაშ სემონიაკმა განაცხადა, რომ პოლონეთის შიდა უსაფრთხოების სააგენტოს თანამშრომლებმა რუსი პერფორმანს-არტისტის, სემიონ სკრეპეცკის მკვლელობის საქმეზე 22 წლის საქართველოს მოქალაქე დააკავეს.

RMF24-ის ცნობით, დაკავებული მახმუდ ა.-ა. გამოცემა წერს, რომ ის სავარაუდო მკვლელს დაეხმარა, რომელიც მანამდე დააკავეს. მახმუდ ა. სკრეპეცკის სახლს უთვალთვალებდა და მის ჩვევებზე ინფორმაციას აგროვებდა.

მახმუდ ა. პოლონეთში დაკავებამდე ერთი დღით ადრე ჩავიდა და კიდევ ორ საქართველოს მოქალაქესთან ერთად გადაადგილდებოდა. RMF24-ის ცნობით, დანარჩენი ორი ქვეყნიდან გააძევეს.

მახმუდ ა.-ს ბრალი წაუყენეს მკვლელობაში დახმარებისა და იარაღისა და საბრძოლო მასალის უკანონო ფლობისთვის. მან ბრალდებები უარყო.

რუსი პერფორმანს-არტისტი სემიონ სკრეპეცკი 15 ივნისს პოლონეთის ქალაქ ბიალა პოდლასკაში მოკლეს. მკვლელობაში პირველი ეჭვმიტანილი 18 ივნისს ვარშავის მახლობლად დააკავეს. პოლიციამ განაცხადა, რომ ის „36 წლის საქართველოს მოქალაქის სახელზე გაცემულ პასპორტს იყენებდა“.

სკრეპეცკი ცნობილი იყო ვლადიმერ პუტინისა და რამზან კადიროვის კარიკატურებით. დევნის შიშით ის 2021 წელს პოლონეთში გადავიდა. მკვლელობამდე სამი დღით ადრე, 12 ივნისს, მან ბერლინში რუსეთის საელჩოსთან საპროტესტო აქცია გამართა. საელჩოსთან მან პუტინის სტალინის მკლავებში გამოსახული ნახატი მიიტანა. აქციის შემდეგ სკრეპეცკიმ მუქარები მიიღო. მკვლელობის დღეს მან მათ შესახებ Telegram-არხზე დაწერა.